情侶10個分手最爛理由 包括：屋企寵物對你敏感…
廣告
分手最爛理由你聽過係邊一句？拍拖當然係合則留，不合則去，既然能成為情侶絕對係講緣份，但去到分手一刻最多係一種緣盡嘅表現。不過總會聽過唔少分手時總係鬧交、惡言相向，甚至會講一啲好爛理由。今次就為大家綜合一下網友票選情侶間10個分手最爛理由，你又有冇聽過？
撰文：Janet｜圖片來源：《戀愛通告》電影截圖、《紀念日》電影截圖、《前度》電影截圖、 《原諒他77次》電影截圖、《獨家試愛》電影截圖、《春嬌救志明》電影截圖
情侶10個分手最爛理由
1.我地比較似家人
其實呢句都真係幾廢，每對情侶最終唔係想想為對方屋企人？講得出呢句說話嘅人，係咪對屋企人嘅定義有啲理解錯咗？
2.你值得更好，我配你唔起
唔少人經常於分手時講呢句說話，表面上係讚你，而事實上只係想將自己希望分手嘅舉動變得冇咁肉酸，等自己良心好過啲，事實上都係廢話一句。
3.你唔識打扮，同你拍拖好失禮
拍拖日子耐咗，總會有厭三厭四嘅情況出現，例如「你唔識打扮，同你拍拖好失禮」相信有唔少人都聽過，但如果你真係厭對方唔識打扮，當初你地又喺埋一齊？真好笑。
4.性格不合，做朋友較好
性格不合唔應該係拍拖前發現？咁會唔會係你當初太衝動拍拖？用「性格不合，做朋友較好」為分手理由，無非都係掩飾自己唔夠愛你。
5.我在乎你，但我唔愛你
相當抽象嘅一句說話，但建議可當廢話處理，因為講完呢句說話嘅人，通常好快唔在乎你。
6.我屋企人唔鍾意你，屋企寵物對你敏感
用屋企人同寵物當分手藉口，其實真係唔知答你咩好，即係拍拖係同一時間同你屋企人、貓狗談戀愛？老老實實，呢個理由都幾不負責任。
7.直接人間蒸發
相信唔少人遇過嘅情況，另一半直接人間蒸發而一句解釋都冇，亦係屬於極不負責任嘅一種行為。
8.八字唔夾、星座血型不配
都算係最離譜嘅一句，八字不合、生肖相剋、星座血型不配等，其實不如直接講唔鍾意我，不過算你幾有創意，但都係嬲。
9.暫時分開比較好
「暫時分開」即係點？即係3年後又喺返埋一齊？咁我可唔可以有另一個？咁你有另一個代唔代表出軌？不如你都係講直接分手啦，無謂拖拖拉拉。
10.最近好忙，想專注工作
得你忙？有邊個返工唔忙？咁都拎嚟做藉口，我唯有答「唔阻你發達」。
