【安心出行】晚市重開首日！餐廳出盡奇招助客人保私隱

撰文：馬高斯 ｜圖片來源： Openrice、領展、Mos Burger Facebook專頁｜編輯：海月

第1招 填紙仔入收集箱

喺佐敦嘅茶餐廳「開餐 Dine inn」，今日開好就準備好一大疊卡仔同埋收集箱，凡係進入餐廳嘅食客，只需要喺卡上填寫個人資料，自助式放入收集箱，講明餐廳職員唔會查閱食客資料，亦唔會要求核對食客出示身分證資料，卡仔保存31日後就會銷毀。

第2招 填Google Form

至於大埔嘅「616 牛肉火鍋專門店」同樣唔會要求食客使用「安心出行」，反而喺舖頭內張貼印有連結去Google Form嘅QR Code，食客只需要喺表格填名、電話等資料，紀錄亦會一個月後銷毀。始終網上收集資料夠晒環保，食客排隊等食果陣可以順便填埋，方便又安全！

第3招 繼續唔做晚市堂食

香港餐廳各有各做，有部份餐廳索性繼續唔做晚市。日式連鎖漢堡快餐店Mos Burger，就宣佈繼續唔做晚市堂食，延長6時後嘅外賣自取9折優惠吸引食客，至於點解就無公佈原因喇！

大家為咗私隱安全諗盡方法，不過身體安全都好重要！今日（2月18日）喺牛池灣彩雲邨商場麥當勞，有顧客懷疑因拒絕使用「安心出行」，襲擊一名餐廳職員，真係首日推行已經問題多多！

另外，香港有唔少老人家，佢哋又唔識用手機，又可能有老花同手震，叫人點登記個人資料呢？唔知大家又覺得各路餐廳嘅奇招有無用呢？