【執屋】老婆講笑：賣晒所有玩具！6招教港男解決土地問題

撰文：馬高斯 ｜圖片來源：《執屋》｜編輯：海月

【執屋】老婆講笑：賣晒所有玩具！6招教港男解決土地問題

屋主Juno同太太Angel，仲有2歲半阿女共住兩房一廳嘅單位，不過Juno有個夢想就係好想砌模型同瞓覺嘅地方分開，於是決定細房用嚟做模型房。不過BB就8月底出世，兩公婆商量後決定忍痛將模型房改裝成兩個小朋友嘅房。

主持人眼見屋入面玩具多到數唔晒，就問吓Juno總數有幾多件同用咗幾多錢。小編都係玩具迷，1000%肯定同屋主答案一樣，自己都無數過，而Juno仲答「投資」咗大約10萬蚊喺玩具上面。

太太Angel仲講笑咁話，自己網上留言不如賣晒老公啲模型。好彩係講笑炸，如果真係賣晒佢，好可能出命案！而且Angel唔鍾意執嘢，亦好彩佢都明白，一個容忍對方啲玩具，一個容忍對方唔執嘢。

依小編所見，收藏玩具其實好小事，閉就閉在唔識善用空間去擺放，只會搞到啲無謂雜物又多又亂。節目入面教咗幾招執屋大法，真係幾有用！令到屋企多返啲空間之餘，世界一定和平咗！

執屋大法

第1招

電池擺太耐有機會觸發漏電危險，所以揼之前要用膠紙封好電池兩邊，防止漏電！

第2招

利用膠箱收藏一啲細小物品，同埋香港比較潮濕記住加防潮珠！

第3招

收納小朋友玩具可用透明細箱分門別類，同時方便小朋友執玩具。

第4招

要用小朋友邏輯同行為去分類玩具

第5招

用相片或貼紙嘅標籤，等小朋友容易理解。

第6招

大人將「執玩具」以遊戲方式進行，培養小朋友（仲有家長）執拾的習慣

經過執屋小隊嘅努力後，尚算整齊咗，小編都係建議Juno租吓迷你倉好啲！