史上最荒謬分手原因台女被分手向網民求救：真的假的？

Jun 29 2022

一段關係由相識到相愛，能夠修成正果固然好幸運，但就算未能夠相守，任何一方想離場都好應該向對方作出交待，妥善處理好。而男女分手理由繁多，常見的分手原因可能係感情變淡、出軌、性格不合等，但不按常理嘅分手原因就可以千奇百怪，令人咋舌。一名台女曾係討論區上發文表示被男友分手，但分手原因超荒謬，唔知信唔信好。而網民睇完發文亦直呼：聞所未聞！

超傻眼分手理由：男友先父忽然上身反對 2人交往？！

該名台女係討論區發文表示，男友非常孝順媽媽，甚至係個媽寶男，而男友媽媽本身亦不太滿意台女家庭背景，不過由於佢哋並非同男友媽媽同住，加上兩人性格互補，因此相處還算不錯。但就係發文前一日，台女原本同男友係床上傾計，忽然間男友開始翻白眼同抽蓄，情境嚇親台女，以為男友同佢過咗身嘅爸爸一樣有心臟問題，急到準備叫救護車之際，男友突然鎮定返，跟住用好陰暗嘅表情望住台女，緩緩開口：「我們家不喜歡妳，請你離開，不要在我兒子旁邊。」台女稱當時成個人起曬雞皮，相當害怕，正當台女唔知點算好，男友就突然倒下去，過咗5分鐘先慢慢起身，並稱頭好暈同詢問台女發生咩事，而當台女講出剛剛發生嘅事後，男友竟然表示「大概真的是爸爸顯靈…為了不要再驚擾到爸爸，不然我們就分手吧…」令台女當場呆咗，亦非常難過同不知所措，並表示「我根本分辨不出來是真附身還是假附身腦袋很亂…」

台女補充男友媽寶行徑驚人，同媽媽超親蜜

發文引起網民熱烈討論，有不少網民表示既荒謬又詭異，認為男友係做戲，更稱媽寶男本來就唔要得，加上男友媽媽唔中意台女，可能成件事係由媽媽策劃！台女隨後亦補充有可能，因為男友好聽媽媽話，加上當日男友休假，可以事前準備好。台女之後更爆男友同媽媽關係非常好，男友放假返屋企媽媽從來唔需要佢幫手做家務，貼身衣物亦由媽媽清洗。如果台女喺男友屋企過夜，媽媽更會要求男友同媽媽孖鋪，寧願台女自己瞓男友間房。