90後回憶殺「網吧時代」已沒落！YouTuber拍片形容靜到似「自修室」！

網吧空氣清新變「自修室」！？

YouTuber去一間細個開到街知巷聞網吧打機，指呢間網吧由以前每區都有一間變到全港得返5間。YouTuber指出網吧間隔同細個回億時差唔不多，不過就少咗嗰陣「強烈的煙味」同埋嘈雜聲，空氣清新咗好多，但可能因為已經甚少人嚟網吧，形容而家網吧靜到好似「自修室」，不過YouTuber指未知是否拍片當時只係中午2點多所以比較少人。

網吧裝備大升級「線上點餐服務」停用

講到網吧價錢方面，YouTuber指出以前細個大概只需＄7、8一小時，但現時最平一小時都要＄13，學生就會平啲同以前一樣只需＄8一小時。而且電腦裝備都大升級，有基礎同電競裝備俾你揀。YouTuber就揀咗比較貴的plan，＄47三小時，有電競裝備可享受，比普通plan更大34寸2k mon、鍵盤手感好同埋有電競櫈坐，張櫈都唔同以前咁溶溶爛爛，變得舒服整潔。而最大分別，YouTuber就嘆息「線上點餐服務」已經停咗，指以前細個去網吧必定會叫嘢食同嘢飲，選擇包羅萬有一日3餐都可以喺網吧搞掂，令你可以同朋友仔全日網吧打通宵機！

唔興玩online game 無買game去到網吧都無得玩

講到打機方面，指以前只要嚟到網吧，基本上所有遊戲都可以免費玩到，而家雖然都玩到大部分online game，不過而家已經唔多興玩online game，大部分人玩的遊戲都要自己買咗帳號先，無買到的話去到網吧都無得玩。YouTuber就表示以前細個去網吧就係因為屋企部電腦唔夠勁或者無錢砌機，所以去網吧玩啲平時無得玩的game，但而家就無咗呢個意義。

一齊睇片：

盤點10大童年時必玩Online Game 跑Online仲玩得！

Online Game︳1.跑Online

「估唔到跑都可以咁好玩㗎！」，當年的確冇估到一隻以跑步為賣點的online game可以興起，以不同奇幻場景同「跑法」去作為設定，讓平平無奇的跑步變得好似賽車一樣好玩！相當年「DJ跳」呢個方法真係要練一段時間！

Online Game︳2.勁舞團

跑完步就要跳吓舞！《勁舞團》作為一隻以節奏為主打的遊戲，除了可以考反應之外，亦都可以睇到角色在遊戲中表演舞技。而且遊戲中更能為角色穿上不同服飾，去滿足一眾學生哥的「穿搭夢」。

Online Game︳3.童話Online

元祖級的RPG online game《童話Online》，推出後就備受觸目。最初遊玩時更是「月費制」，唔少學生哥為玩《童話Online》都死慳死抵自己的零食錢，務求可以俾得起月費！

Online Game︳4.巨商

細細個就可以體驗從商的趣味，唔少人加入遊玩《巨商》，遊戲中一路打機一路體驗買賣的樂趣，仲要有一轉，二轉等Level要刷，都真係幾爆肝吓！

Online Game︳5.SD Gundam

以SD高達對戰作為online game，並以高達對戰作為賣點，成為一眾高達迷的最愛。而且抽高達更加入了「扭蛋」元素，令到同學間可以一較高下，睇睇邊個抽的高達更高級。

Online Game︳6.《魔獸爭霸之信長之野望》

由香港本土玩家阿峰製作的地圖信長之野望，可算是香港人集體回憶，玩魔獸爭霸除了玩Dota地圖外，信長就是香港人不二之選的地圖，而版本11.2B也是最受歡迎的版本，用魔獸爭霸內原有的角色模組再加以改裝並安上日本武裝名字，再以即時戰略形式遊玩，叫遊戲的趣味度大增。你會見到總有一班玩家在玩信長，而香港亦有舉辦過大大小小關於信長的比賽，信長的確是香港人在區域連線遊戲上的大大回憶之一。

Online Game︳7.《CS》

玩開槍game一定會在細個有玩過《CS》，當年CS1.5／CS1.6 可算係網吧中最搶手的區域連線遊戲！而且用區域連線的方法也不太容易，更有機會在遊玩過程中斷線呢。但是這些因素也無阻玩家對CS的熱愛，只要一進網吧就能見到很多人在玩CS，槍聲不斷，實在有一個進入戰場的感覺呢。

Online Game︳8.彩虹冒險

筆者當時就是玩《彩虹冒險》學識打字！以2D俯瞰形式遊玩的《彩虹冒險》，最吸引的當然是玩PVP，用風劍屈其他玩家於角落，真係勁爽！BTW當時仲要死慳死抵買點數課高級角色。

Online Game︳9.LFO

小朋友齊打交推出的Online版本《LFO》，遊戲人物3D化，當時亦成為了熱門遊戲。筆者當時不才，很多時候都會去高level地區吸人經升lv就算數！

Online Game︳10.亂Online

以「未來風」同「學院風」為主的《亂Online》，推出後不斷萌生出「私服」，當時周街開紅打架真係超爽！