Hermès女王：新加坡名媛Jamie Chua公開複式豪宅全貌，大曬Hermès手袋牆

複式豪宅設備齊全，化妝間同衣帽間如女人天堂

Jamie透露過往因為考慮到保安原因，從未公開過大屋全貌，趁着今次搬屋，佢就首度公開分享豪宅內貌。片中所見Jamie豪宅係複式設計，坐落河邊，整體裝修風格十分具現代感，設有泳池、戶外花園、私人酒窖、影院、Spa Room等。除咗泳池係Jamie經常影靚相嘅打卡位，Jamie亦於片中介紹佢喜愛嘅戶外花園，花園種有香蕉樹、木瓜樹等，Jamie仲圍有一個區域養雞，猶如一個迷你農場，為豪宅添加田園色彩。

而屋內設有旋轉樓梯，客廳擺放了不少植物、名牌擺設和香薰蠟燭，非常有情調。不過要數全屋最奢華吸睛一定係Jamie嘅閨房！除咗有一個各類名牌護膚品、高級化妝品應有盡嘅化妝間外，仲有一個放滿名牌高跟鞋、高級首飾同名牌包包嘅衣帽間。

擁有超過200個Hermès，各式收藏品過千

片中所見，Jamie家中設有2處位置放置手袋，一處至於角落，放置除咗Hermès外嘅各式名牌包包，如LV、Chanel等。而另一處則需要密碼才能進入，進入後一入目就係多不勝數嘅Hermès手袋，猶如一間手袋陳列室，十分誇張。出名鍾意收藏Hermès手袋嘅Jamie稱擁有過200個Hermès手袋，分別有各種款式、材質同顏色，當中全球最貴嘅限量版Himalayan Birkin Bag她都集齊大、中、細三個Size，可謂羨煞旁人！

除而咗包包數量驚人，Jamie連護膚品、化妝品亦有不少，她透露自己有過千支香水、2000支唇膏，再加上琳瑯滿目嘅高踭鞋、衫、首飾等，要打包搬走非常花時間，最後足足有成400箱行李，單單Hermès嘅盒就已經堆到山咁高！

20歲童話式際遇，婚後開掛式人生

現年44歲的Jamie Chua蔡欣穎係一位中印混血兒，曾在新加坡航空公司任職空姐，20歲時與印尼華裔億萬富豪Nurdian Cuaca一見鍾情，隨即閃婚，就如童話故事情節灰姑娘一樣。婚後Jamie更誕下一仔一囡，日常生活出入有豪車接送、有工人伺候，閒時外出遊玩，可謂生活無憂。而Jamie更開始發展自己嘅事業，於東南亞開設多間名牌鞋專賣店 Manolo Blahnik，家庭事業雙得意可謂達成不少女士心中夢想！

發現老公出軌，採取雷霆手段，離婚後每月袋245萬

可惜Jamie係2010年發現老公出軌，隨即Jamie便決定離婚。而離婚前，Jamie發現到前夫意圖要轉移資產，為咗保障自己利益，Jamie亦馬上將前夫名下股票、豪宅等價值超過25億港元嘅財產向法庭申請資產禁制令，令前夫不能動用資產。最後離婚官司Jamie獲勝，而男方就要每月支付45萬新加坡幣（約245萬港元）比Jamie當生活費，因此佢亦被稱為「最有手段名媛」。

Jamie恢復單身後，先拋售前夫係香港嘅千萬美元物業，更開始環球之旅，據悉Jamie 花咗3年時間走遍世界各地，入住超豪酒店、食盡最知名的餐廳，謠傳佢平均一天消費達15萬港元，係一般人平均半年或以上月薪收入，十分奢華。