20首經典洗腦卡通歌

熱話

廣告

重記得一放學即時衝返屋企,功課做到一半就忍唔住打開電視睇卡通片嘅日子嘛?當年嘅外購(通常都係歐、美、日)卡通,除咗配上廣東話之外,亦會將原著歌曲配上港版歌詞,再搵香港歌手唱1次,誠意十足之餘,大家日日聽住,返到學校又同同學仔一齊唱,真係入晒腦!

所謂潮流嘅嘢,20年一個循環,好似近嚟荃灣愉景新城搞咗個《飄零燕》展覽,不知幾受歡迎,一啲都唔過時!有見及此,編輯部就嚴選咗20首最經典洗腦卡通歌等大家重溫。整理之後,發覺當時唱得最多經典卡通歌,除咗係「小太陽兒童合唱團」,就係胡渭康哥哥,原來佢先係卡通歌王!

text-東

 

No.1 美少女戰士

卡通經典,主唱嗰3位重經典,係由當年3位寶麗金小花:王馨平、湯寶如、周慧敏主唱,講多無謂,即時俾大家睇下呢個經典MV!

http://www.youtube.com/watch?v=_Z8GFWrVj1g

 

No.2 宇宙大帝

套卡通係因為首主題曲而紅,當時香港有邊個細路唔識唱民間改版:「神奇大帝穿咗個窿,娶咗3個妾侍,有個放屁(冇氣),有個痘皮,有個病到就嚟死。」

原唱者為威利。但因唱片係由華星推出,威利唔係佢哋嘅合約歌手,所以叫哥哥張國榮代唱。

威利版

http://www.youtube.com/watch?v=EQUOh9kHqJ8

張國榮版

http://www.youtube.com/watch?v=NMqhhCBBgPs

 

No.3 黃金戰士

由胡渭康哥哥主唱嘅〈黃金戰士〉,到而家我都唔明黃金俠點解會令「烏蠅都嚇死貓兒都嚇死」?

http://www.youtube.com/watch?v=HHk5kaQP470

 

No.4 電子神童

又係阿胡渭康哥哥主唱嘅經典卡通歌,當年個個細路都會模仿主角石野嵐打機時嘅絕招﹕「真空低氣壓」、「鯉魚翻身」、「火燄陀螺」,唔知有幾多人整爆過自己對門牙呢?

 

No.5 一股歪風(《電子神童》插曲)

冇辦法,《電子神童》呢套卡通實在太經典,除咗康哥哥主唱嘅主題曲,呢首由梅姐梅艷芳唱嘅片尾曲都極受歡迎。

 

No.6 IQ博士

講開梅姐唱卡通歌,又點可以唔提呢首佢扮小朋友聲嘅《IQ博士》主題曲?最初真係冇乜人認得佢把聲㗎!

No.7 足球小將

唔需要多介紹啦下嘩?好多年之後,主唱者張衛健話,當時嘅唱腔係學哥哥張國榮嘅。

http://www.youtube.com/watch?v=xfgTXnS7O8Q

 

No. 8 舊版叮噹主題曲

我哋呢啲80後,始終鍾意聽番原版嘅叮噹。Sorry,係多啦A夢主題曲先啱。喺網上搵資料時,呢首歌嘅原唱有啲寫「環星兒童合唱團」,亦有啲寫係「小太陽兒童合唱團」,到底邊個啱呢?有冇大大知道?

 

No.9 畫叮噹

呢首教人點畫叮噹…sorry,係多啦A夢嘅歌,比起主題曲一樣咁經典,原唱係「小太陽兒童合唱團」。

 

No.10 千年女王

主題曲〈千年女王〉同插曲〈傳說〉都係由路雲娜所唱,但好似插曲比主題曲經典,阿路雲娜姐姐而家登台都係唱插曲多。

http://www.youtube.com/watch?v=DP4logidl-M

 

No.11 飄零燕

主唱蔡麗貞當年喺TVB《聲寶之夜》歌唱比賽,成為最年幼嘅冠軍得主,有天才童星之稱,佢職業歌手生涯最出名嘅歌,都係呢首〈飄零燕〉。

 

No.12 我係小忌廉

由戴蘊慧唱嘅呢首主題曲,當年唔止女仔日日唱,就連男仔都會愛上,筆者就係其中之一。

No.13 藍精靈

都係由「小太陽兒童合唱團」主唱,唔知大家有冇聽過坊間1個三級嘅歌詞版本?

 

No.14 小丸子的心事

港版主題曲〈問題天天都多〉由歐倩儀唱,亦都好hit,但編輯部就更喜愛呢首由何CC唱嘅插曲〈小丸子的心事〉,當年嘅阿詩已經好索喇~~~~

 

No.15 小雙俠

其實首主題曲一般,但套卡通無論喺日本定係香港都大紅,連帶主題曲都個個識唱。

http://www.youtube.com/watch?v=IReuwiayu5c

 

No.16 機動戰士高達

同樣地,由於套卡通太經典,連首歌都家喻戶曉。由王愛明姐姐主唱。

 

No.17 HE-MAN

「我已經充滿力量喇!」每次聽完呢首由小虎隊唱嘅主題曲,筆者都感覺全身充滿力量。

http://www.youtube.com/watch?v=gfVkTZVEbsY

 

No.18 高狄安

由第1代小虎隊成員蔣慶龍所唱(再加上胡渭康、林利,第2代係孫明光代替蔣慶龍)嘅主題曲,由於氣勢非凡,所以就算套卡通一般,當時首歌就個個細路都識唱。

http://www.youtube.com/watch?v=FXu1rkE6mnc

 

No.19 忍者小靈精

又係「小太陽兒童合唱團」主唱,係藤子不二雄Ⓐ嘅作品,首歌同套卡通一樣咁經典。

 

No.20 怪物小王子

都係藤子不二雄Ⓐ嘅作品,不過今次主唱係胡渭康。

http://www.youtube.com/watch?v=4zhHaaw9EMU

YOU MAY ALSO LIKE ...