千祈唔好望後面……農曆七月23個鬼節禁忌

熱話

廣告

農曆七月十四係俗稱「鬼節」嘅盂蘭節。相傳亦都係靈界「朋友仔」出嚟行街食嘢嘅季節。小編就同大家講下農曆七月,香港有咩傳統禁忌啦。

注意:並非精密科學,信不信由你。祝你好運。

撰文:Kevin Au、白仔 | 圖片:Instagram、YouTube 截圖、電影截圖、一炷香探秘團

農曆七月23個鬼節禁忌

1. 切忌著黑衣紅衣

無錯著黑色衫可以顯瘦。但係靈體就最鐘意依附喺黑黑沉沉嘅顏色上面。而紅色對一啲力量強大甚至枉死嘅惡靈體嚟講係吸引同埋標奇立異嘅顏色,容易惹佢地注目。如果你唔想咁多「朋友仔」跟住你出街返屋企,就要留意下喇。

2. 聽到有人嗌你唔好輕易望返轉頭

月黑風高晚上獨自歸家又或者秋風起去郊遊嘅時候,當你好似聽到有人叫你,唔理三七二十一,千祈唔好咁衝動望返轉頭應佢。可能係「朋友仔」叫你落去同佢一齊玩。

3.切忌自己一個人

依個其實都算係所有大時大節都適用嘅禁忌。但係如果你農曆七月都成日自己一個,就好容易引起「朋友仔」嘅注意。都係留返聖誕新年先一個人過啦。

4.切忌夜晚亂影相

如果你鐘意無時無刻都拎部電話出嚟影下相,有人又影,冇人又影,小編唔會阻止你。但係小編會勸你唔好自己開返啲相嚟睇,因為可能會有意想不到嘅效果。

5.切忌鬼節游水

「欺山無欺水。」自古都有傳說指「朋友仔」鐘意聚集喺濕嘅地方。為保生命安全,小編就會儘量避免喺農曆七月玩水喇。

6. 披頭散髮訓覺

鬼門關大開,四圍都係投唔到胎嘅遊魂野鬼。如果你唔吹靚個頭先訓,陣間比佢地誤會你係同類叫埋你起身去食宵夜,咁你真係要諗諗去食咩好喇。

7.切忌靠牆行/訓

冰冷嘅牆壁一向係「朋友仔」鐘意依附喺上面休息嘅地方。如果你有其他休息嘅地方選擇就唔好同佢地爭喇。如果唔係佢上左你身都唔知。

8. 不要拖鞋頭向床

相傳「朋友仔」能夠以拖鞋鞋頭嘅方向去判斷生人嘅位置。如果你拖鞋鞋頭向床,咁佢地都好難唔知你訓左喺邊。唔想「比鬼壓」嘅你就要留意下。

9. 半夜晾衫

頭先講過「朋友仔」好鐘意聚集或者依附喺濕嘅地方,濕嘅野甚至會令佢地難以脫身,所以濕嘅衫都唔例外。如果你半夜晾衫,就同開壇捉鬼分別不大,何況依家係農曆七月呢。

10. 執路邊嘅錢

依排落街你可能都會見到街上會有好多錢喺地下,你唔好見錢就執呀!果啲錢唔係比你洗架!啲錢喺用嚟買通牛頭馬面嘅,如果你拎左佢地嘅野,後果不堪設想!

11. 唔好周圍亂望

唔好四圍望喇!唔係鬧緊你,而係如果你唔小心望到「朋友仔」又成功比佢地嚇親,咁你就中左佢地計喇。因為依個正正喺佢地上你身嘅好時機。

12.切忌亂吹口哨

識吹口哨係幾型嘅。唔只我覺得係,連「朋友仔」都係咁話。

13. 不要叫人全名

夜晚同三五知己屋企人出街就唔好叫人全名。如果「朋友仔」聽到同記得你全名,咁佢都應該唔會唔記得,方便隨時搵你。諗下有冇花名叫啦,不過如果你想整蠱你嘅 Friend 又不妨無時無刻都叫佢全名架。

14. 不要捱夜

日頭返工已經夠攰,繼續捱夜只會令自己人氣更虛,而夜晚又係佢地最旺嘅時候。一凹一凸,咁就容易比「朋友仔」乘虛而入。認真,你又可以多一個理由同老細講唔想比鬼上身所以唔開 OT 喇。

15.切忌搭身邊人膊頭

人有三把火唔知你有冇聽過。中國傳統認為人嘅頭頂,左右膊頭都各有一把火用以保護自己免受外力入侵。當你搭人膊頭就即係冚熄佢把火。又多個機會比「朋友仔」上身喇。

16.切忌夜遊

早啲返屋企同屋企人食飯唔好咩?陣間行行下又唔知比「朋友仔」帶左去邊。

17. 掛風鈴於床頭/窗邊

風鈴清趣嘅聲音唔只會吸引你,仲會吸引「朋友仔」。如果咁啱床頭或者窗邊有風鈴,小編會勸你收埋佢。

18. 隨意燒陰司紙

希望你真係唔會悶到冇野玩而去買疊陰司紙嚟燒。因為你一燒就會好多「朋友仔」埋嚟等收野。一般除左拜神同祭祀之外,都唔建議隨便燒陰司紙。

19. 偷食祭品

燒肉好好味,橙又有豐富維他命,開餐先!我相信睇緊依篇文嘅你都有能力令你自己唔去咁做。如果你屋企有小朋友甚至寵物就唔好比佢地食祭品喇。同「朋友仔」爭食從來沒有好結果。

20. 切忌走廊冇燈

屋企入面嘅走廊都好難有光線進入。長期不見光好容易令「朋友仔」聚集,農曆七月就更加係熱鬧添啦。所以如果你屋企有條長走廊,就最好裝返盞燈。

21. 筷子插飯變拜祭

小編細個成日咁做,都唔知點解成日比人鬧。大個先知原來係拜祭先會咁做。如果你想「朋友仔」share 你碗飯,不妨試下。

22. 半夜慶祝生日

如果你真係咁啱農曆七月生日,小編會勸你唔好同朋友夜晚慶祝,吹蠟燭,切蛋糕。因為你會發現你嘅朋友唔只得咁少,甚至有多幾個人同你唱生日歌。

23. 捉蜻蜓同草蜢

民間傳統認為蜻蜓同草蜢都喺「朋友仔」嘅化身。你捉佢地同向「朋友仔」直接挑機冇分別。

 

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!