林作學拳、鍾培生代交學費又走數！拳館導師拍片：大師兄記得找埋條數

撰文：神仙b｜圖片：林作Facebook、鍾培生Facebook、翁靜晶Facebook、Henry YouTube截圖｜編輯：海月

拳館稱鍾培生學拳唔俾錢 上YouTube拍片追數

林鍾二人都決定落場打比賽，自然兩人都要搵教練操fit自己啦。不過，近日就有人係網上爆料稱鍾培生學拳之後冇找學費。翁靜晶仲幫手轉發，引起大家嘅關注。

翁靜晶係於社交媒體上出post稱片中之人叫Henry李俊亨，係佢嘅好友。Henry 哥哥睇來好得翁姐姐歡心。翁靜晶稱佢為貴金屬專家、金融才俊、車手、拳師，還修讀法律。

翁靜晶更盛讚揚Henry：「論財富家境學問外表，絕不輸給任何人。他最『正』的身分，卻是功夫佬，義氣仔女一個。仗義疏財，替林作繳交學費，免得向師傅為難。Henry 的確是好漢！」

Henry稱鍾培生答應幫林作俾拳館費用，其後走數冇俾

有傳，鍾培生為要林作出賽，當初除了俾100萬外，仲答應負擔林作一切學拳操練嘅費用。而當日林作到拳館練習之後，的確沒有人付學費。

Henry拍片稱鍾培生曾經亦跟過佢師傅向柏榮學過拳，自己應該叫佢一聲大師兄。先禮後兵咁話欣賞對方是慈善家，又是香港電競業之父不過。

話鋒一轉，Henry就寸鍾培生，有錢都唔肯俾學費。仲寸佢富二代脾氣火爆。僅僅因為林作一句「跟風」就要用100萬去打人。最後仲篤曬臺話：「但係介紹林作去練拳，就冇錢畀林作，你都出得一百萬，十幾萬你都畀唔起？你都係想林作上台俾你打餐飽啫，你畀唔起，你要玩嘅，我咪幫你畀囉！」

直至Henry出片當日，拳館向媒體表示已經收到由Henry支付的學費。

&feature=emb_logo

鍾培生逐條反擊 堅稱自己冇義務找數

鍾培生事後分別在翁靜晶的post以及Henry的YouTube Channel留言逐一反駁：

1）並非同門師兄弟，僅於2018年4月19日見過一次向師傅

2）同向師傅冇交情亦無需同大家交代

3）林作托自己介紹拳館，自己僅僅向林作提供幾個聯絡方式，並沒有其他跟進

4）自己從未唔找數，只有找多咗或者早找咗條數

5）指責Henry標題同內容有誤導成分，稱自己並沒有義務為你或林作找拳擊學費

附上回應原文：

「第一、 我唔係你師兄， 只在2018年4月19日唯一一次拜訪向師傅見面一次；第二、我同向師傅交情無需同大家交代；第三、林作托人搵我介紹拳館，我向委托人提供了幾個聯絡方式，並沒有再跟進；第四、我言出必行，從未出現唔找數，同時只會早咗找或找多咗；第五、你標題同內容有誤導成份，我並沒有義務為你或林作找呢條數！」

呢件羅生門最後發展成點，就歡迎大家繼續關注落去啦。