你估到嗎?赤道賊男張震最想做嘅角色竟然係…?(汗)

熱話

廣告

3年前《寒戰》玩警隊內部權力鬥爭,集懸疑、動作、鬥智、扭穚於一身,喺香港扭出4千萬票房。3年後,導演陸劍青+梁樂民再次出手,集中港台韓分量級演員於《赤道》,故事講述國際頭號通緝犯「赤道」,成功由北韓偷取濃縮鈾原料後,準備喺香港轉售,事件引起中國、香港、韓國以及美國等高度關注,外交角力賽連番爆發嘅同時,內鬼亦都……

戲中飾演國際通緝犯嘅張震,拳拳到肉man到核爆,戲外,笑笑口話自己做1個冇人捉到嘅賊感覺好爽,之後再笑笑口話其實好想學烹飪、好想做啲可愛嘅角色……估佢唔到嘅程度,有如估唔到「赤道」原來另有其人一樣。

text – Phoebe photo – Sun


其實我都想

張震對上一次拍時裝戲,原來已經係2年前嘅《聖誕玫瑰》,一心以為佢對古裝情有獨鍾,結果因為「方便」兩個字,令我估錯了。
「今次算係比較新鮮,因為都有一段時間冇拍時裝戲,其實之前一直想拍,因為拍古裝比較辛苦,化妝時間長,着嘅戲服又麻煩,例如要去洗手間或者食飯都唔係咁方便,所以某個程度嚟講,個人較為鍾意拍時裝戲。當然,接戲嘅定義唔係時裝戲定古裝啦!但而家嘅我比較偏向時裝。不過,最終都係要以戲嘅內容為主。」

飛車超快感

本身都會喺台北街頭揸電單車飛下嘅張震,今次因《赤道》而喺廣東道飛車,雖然話去到最後愈開愈快有啲驚,但呢個都係男生夢寐以求嘅機會,確實令佢爽丫丫。
「戲中做反派,第1次做咁奸嘅人,又有好多槍戰、飛車場面,呢個我覺得幾好玩。錢家樂係動作指導,佢本身係演員,所以好為演員着想,每次拍危險鏡頭時,佢都會搵替身試1次,確保冇危險性先俾演員落場,令到大家都好有把握去完成所有鏡頭,同佢一齊做嘢好愉快,飛車嗰場戲喺係尖沙咀拍,槍戰就喺佐敦停車場拍,呢個感覺好過癮又好特別。睇完電影之後,我覺得水準好高,亦睇得好過癮,因為一般嘅動作電影可能得嗰3或5分鐘,但今次打極都有,能夠同呢個團隊合作,我覺得好榮幸。」


演員的態度

拍《一代宗師》時,張震學八極拳學到出賽攞冠軍,拍《吳清源》時,圍棋練到可以同專業人士鬥棋,去年為春晚表演,連古琴都學埋,有冇咁堅?

「因為我本身係個好唔認真嘅人,哈哈!所以我做好多嘢都做到好認真。特別係拍戲,因為私底下我真係唔多認真,但為咗拍戲,唔可以被人睇到有破綻,雖然我只係演戲,但都希望可以做得更似、更冇破綻。(重有咩想學?)嘩!好多……好似煮飯咁,因為本身好鍾意食嘢,電影如果要將美味呢種感覺表現出嚟,其實好難,技巧方面有切、蒸等等,每個程序都好重要,然後我就會諗,如果有部戲嘅角色係同食有關,應該都會幾過癮。因為細個大家都會睇《食神》,所以好有印象。(想改戲路?)想,之後想拍啲平易近人、輕鬆、或者係比較可愛嘅角色,哈!」

JM的驚喜

文詠珊(Janice Man)喺戲中飾演張震助手,開拍前半年已經接受武術訓練,結果平時感覺弱質纖纖嘅佢,變成飛車、開槍都唔眨眼嘅打女,打到連張家輝都話怕怕,認真程度同張震有得比。
「佢打得好好、好狠,表現好好,佢真係好認真,可能係因為佢一出道大家俾咗個定位佢,但我覺得佢真係一直都好努力、有進步,佢喺做戲方面亦有好多唔同嘅一面,你睇《赤道》就知道,原來佢都可以咁狠,我覺得真係好唔簡單,女仔睇到佢嘅個角色應該都會好鍾意,因為嗰種絕不妥協嘅性格好吸引。雖然我哋喺戲中係拍檔,但好多時都係分開演,哈哈!不過佢同家輝哥對打嗰場戲我真係好鍾意,喺澳門同埋差館被人審問,我覺得好cool。」

迷倒歌神之下

張學友喺戲中所演嘅教授神態自若,每次出場均成為全場焦點,有時甚至連張家輝都被比下去,面對深藏不露嘅張學友,雖然未知有冇續集,但張震已舉手話想再合作。
「我做賊佢(家輝)做警察,所以遇到嘅機會好少,但可以同佢哋(家輝同學友)一齊做嘢,係個好好嘅經驗,因為好鍾意佢兩位,尤其係學友哥,我最鍾意嘅其中一部電影係《東邪西毒》,好鍾意佢演嘅北丐(洪七),係我睇過咁多套電影當中1個好經典嘅人物,今次對手戲少啲,睇下之後重有冇得合作。至於同崔始源、池珍熙、余文樂,每次見面都係揸住把槍,但又捉我唔到,都幾爽,哈!我重可以跑得比較優雅有型,而佢哋就跑得比較辛苦。」

http://www.youtube.com/watch?v=R2JsyJ0hEj0

http://www.youtube.com/watch?v=7KvcECbU0xw

伸延閱讀

《寒戰》之後-梁樂民、陸劍青有嘢講

《寄生獸完結編》寄不如人

《我和dior的華麗邂逅》時裝精必讀

YOU MAY ALSO LIKE ...