【藍橘子】《認真討論：點解做PTGF唔做雞，點解咁貴都要光顧，而唔去叫雞？》

內容由博客提供及授權轉載，不代表本刊立場

最近鬧得熱烘烘嘅話題，一定係PTGF。男嘅驚出現自己女朋友，女嘅驚自己男友幫襯過PTGF。每日望住又有新一批PTGF被爆，有種當年追陳冠希照片集嘅感覺。

但我覺得最有追看性，係有PTGF嘅女仔表示，因為接受唔到做麥記，搵得幾十蚊一粒鐘，而去做PTGF。亦有女仔講出自己慘況，講到做PTGF唔係出賣自己肉體，只係一件「唯一可以做到」嘅事。

將責任推卸畀現實社會，再編造一個藉口逼自己埋牆角，做PTGF都係逼於無奈，將自己幻化成受害者。

其實呢堆藉口根本呃唔到人，佢哋呃嘅只係自己。

所有PTGF都堅持一個原則，就係佢哋同妓女有分別。

點解？因為女仔普遍都覺得，PTGF係高尚過妓女…少少。

討論區見到一班PTGF開價，都紛紛表示「呢個價我可以叫十次優質雞！」

不過，PTGF的確係有價有市。點解PTGF即使樣唔太靚，身材又唔太正，價錢又貴。

大家都咁熱烈去幫襯呢？

因為…連男人都覺得，PTGF係高尚過妓女…少少。

我幫襯PTGF，好過去叫雞，叫雞真係好低俗。幫襯PTGF係幫忙年輕人渡過經濟難關。

好多人都鍾意為一件錯嘅事唯美化。我搔爆頭都諗唔明，點解會有人支持一個賊…覺得佢身上有值得學習嘅地方，甚至覺得佢代表咗當年嘅香港。

打劫金舖銀行，通街持槍亂掃。無論佢背後嘅目的幾咁偉大，心中理念幾咁啟發人心。都唔值得去支持啩。

最近，經常提到一個詞彙叫「核心價值」。

大家都開始熱烈討論，到底乜嘢先係香港人嘅「核心價值」。

有人話係獅子山精神，咁乜係獅子山精神？

源於70年代的電視劇《獅子山下》，形容獅子山精神就係刻苦耐勞、同舟共濟、不屈不撓…

不過聽落並不太適用於現今香港人，的確打工仔係非常「刻苦耐勞」。但完全唔係同舟共濟，小至

一間辦公室，大至香港政治，好多情況都係表面同枱，密謀緊反枱之後自己點先可以漁人得利。

唔單止係香港。我認為呢一個世代，核心價值就係「搵藉口」

有冇計過，我哋每日搵藉口嘅次數有幾多？

想跑步減肥，想早啲訓，想睇多啲書…

然後搵一大堆藉口，因為太忙、太攰。將責任推卸畀時間，畀一個安心嘅理由去偷懶。

又或者做咗一件錯事，會搵一大堆藉口幫自己辯護。

只要有藉口，就可以令自己無咁有罪惡感。

因為女朋友唔肯同我性交，我先去搵PTGF。

因為我想證實自己仲愛唔愛男朋友，所以我同另一個男仔出街。

因為我想有被愛嘅感覺，所以我去做PTGF。

做任何事都需要勇氣，缺乏勇氣，所以要搵藉口幫忙。

其實最需要勇氣，就係面對自己。

內容延讀：
【藍橘子】《情侶要有私隱，但不代表要隱瞞》
LIKE我們fb
fb.com/newmonday.com.hk