【藍橘子】《男仔鍾意打機就係原罪？》

部分內容由博客提供及授權轉載，不代表本刊立場！

男仔打機係原罪？

有個朋友佢叫阿達，因為太沉迷打機而同女朋友分手，就咁聽落佢好犯賤，為一隻虛擬嘅遊戲，放棄真實世界嘅女朋友。

所以阿達呢排心情非常低落。佢失落，並唔係因為無咗個女朋友…而係因為佢被周圍嘅朋友、以及（前）女友嘅閨蜜視為賤男人。

根據阿達所講：「我都想有返少少娛樂啫，點解佢放工返到屋企鍾意煲韓劇就得，我放工返到屋企，就一定要陪佢煲劇先叫好男友啊？！」

阿達由細到大都好鍾意打機，記得我讀中學時，幾乎每日放學都會去佢屋企做Project…（實際上係打機）。

佢每一部家庭主機都會買，雖然唔識日文，但會自製攻略返學校派畀同學。到畢業出嚟做嘢，識咗個女朋友之後，就開始管制住阿達打機。

以下係女朋友指出阿達嘅三大罪行：

１）男人打機唔上進

「喂！想點啊大佬？唔通我返到屋企仲要讀書進修咩？！」
有次阿達約我出嚟飲酒訴苦，話女朋友覺得佢返到屋企打機唔夠上進。

打機嘅男人除咗畀人感覺唔夠上進，有時仲忽略咗身邊個伴侶。女朋友想阿達陪佢多啲，但阿達放工只想頹廢地坐喺梳化，全神貫注進入遊戲世界。

２）掛住打機唔陪女朋友

「Ｘ！好似以前細個咁囉，你睇十五分鐘電視，阿媽就會鬧你唔肯溫書，淨係掛住睇電視！」

阿達返工好大壓力，佢只係要求每日打一個鐘頭畀佢放鬆心情就足夠。正如女仔鍾意煲韓劇，一睇就全日唔離開個螢幕，但點解睇劇就係興趣，打機就變到好似吸毒咁？！

３）打機太投入會發脾氣

「痴線！我唔投入咁玩嚟有咩意思？發脾氣都係對住個螢幕鬧啫。佢自己夠幻想韓星係老公啦！」

男人打機永遠都好投入，大聲吼叫，拍抬拍凳講粗口呢啲一定要做。因為打機最開心，就係全情投入。

但阿達女朋友，就永遠唔想佢太投入，只想阿達專心對住佢一個人。

其實阿達每次向我訴苦，幾乎都係同女朋友為咗「打機」而鬧交。最近唔知邊個頂唔順邊個，兩人終於分手。

阿達亦開始承受分手後遺症，有一大堆八卦傳出嚟鬧佢，話佢係賤男。阿達真係好唔明白，究竟鍾意打機，有咩得罪到人？

「點解唔肯為咗我放棄打機？到底我重要！定係打機重要？」呢句係阿達女朋友嘅口頭禪。

有啲女仔，好鍾意將自己放喺天秤上問伴侶邊樣重要啲，亦即係間接逼男朋友放棄所有嘢。

女朋友同打機邊樣重要？咁梗係伴侶重要啦！
不過，一個唔重視自己興趣嘅女朋友…點樣同佢白頭到老啊？

我覺得每個人都可以擁有自己興趣，只要識得分配時間，又或者你陪我打機，我陪返妳睇劇，都可以係情侶之間嘅一種樂趣嚟～

部分內容由博客提供及授權轉載，不代表本刊立場！

內容延讀：

【藍橘子】《去婚紗展就見識到咩叫神級推銷》

>>> LIKE我們fb <<<
fb.com/newmonday.com.hk