【藍橘子】《愛情未必一生一世,但搵啱一個髮型師,一定要跟足佢一世》

熱話

廣告

【藍橘子】《愛情未必一生一世,但搵啱一個髮型師,一定要跟足佢一世》

我覺得,相比起對伴侶嘅愛情,搵啱一個髮型師,更加值得天長地久。

正所謂剪柒個頭,留返長係幾個月嘅事。
但搵到一個啱自己嘅髮型師,真係希望追隨佢一輩子。

其實我要求唔高,淨係想剪完個髮之後,可以挺起胸膛返工啫,點解都咁難?

剪髮絕對係一門專業,但市面上80%髮型師,係專門剪柒客人個頭…得返20%你可以放心將個
頭,同未來兩個月嘅樣貌交托畀佢。

我知…價錢問題嘛,去啲貴價髮型屋,搵個領導級、大師級、設計級就可以剪到個靚髮。

但我真係畀唔起500蚊剪個髮啊!而家睇新聞講啲年輕人儲錢買樓,一年只可以睇兩次戲,四年
先可以去一次旅行,我唔想剪髮剪到買唔到樓囉。

話說有一次,我放工諗住去剪個清爽嘅髮型,點知剪開嗰間髮型屋執咗笠,隔離街開咗間新,就入

去試一試。

一入到去見個髮型師衣著時尚,個頭成個張智霖咁款,笑容滿面走埋黎,問我「先生幾位,MARK
開女定仔?」

我話「一位,淨剪髮。」

洗完頭佢問我想點剪,我話想兩邊同後面鏟青Undercut,頭頂同瀏海修少少就夠,唔想要柏豪頭。

「OK!明白!無問題!即係成個韓星咁款啦~」
「咪住先…你講邊個韓星?」
「好出名嗰個咩基囉。」
「韓男宋仲基?」我確認我同佢講緊同一個人。
「係喇!就係佢!你係咪想剪到佢咁?」
「又唔使剪咁短…」
「嘘!男人講呢啲~OK!明白!無問題!」髮型師對住塊鏡做咗個OK手勢。

我有近視,剪髮要除眼鏡所以睇唔清剪成點,雖然髮型師搞嘅gag唔多對路,但唔可以因為一個人搞
爛gag就判斷佢剪得差…

佢一手拎起電鏟,另一隻手好佻皮咁拎住把鉸剪喺手轉咗幾圈,佢話「我哋黎個激啲嘅!」

我正想講其實我份人比較保守,希望佢尊重返我。但佢已經揪起咗我執頭髮,由下而上一嘢鏟上去!

「哎呀!」佢喺度捽眼…
「你做乜啊?」
「你啲頭髮彈到我隻眼。」
「……」佢自己話要激啲,佢竟然怪我啲頭髮彈到佢隻眼?!

「唔洗鏟咁高…」
「兩邊要平衡嘛!得!OK!明白!無問題…」

望住啲頭髮一束束咁跌落黎…我終於明白,點解啲藝員拍戲剃頭會流眼淚。

剪完個頭,我戴眼鏡照一照鏡,若果將我個頭化成象形文字,一定係性器官嚟。

「我想問…你究竟知唔知邊個係宋仲基?」
「知啦~我好鍾意聽佢唱歌~」
「唱歌?!」我虎軀一震。
「係啦~我畀幅相你睇。」

佢用手機搵幅相畀我睇,係鄭中基!!

「鄭中基點會係韓星啊大佬?!」
「佢好韓嫁,唱歌又韓,拍戲又韓。」
「你係咪想講佢係紅星…?」
「係囉,我頭先咪話紅星囉,我連講嘢口音都學佢講唔正,幾搞笑啊~」
「……」

最後,我就帶住呢個鄭中基頭離開髮型屋。
明明話OK明白無問題…
明明話人與人之間,唔應該靠科技去溝通,面對面交談先可以消除隔膜,化解誤會…

咁點解宋仲基會變成鄭中基呢?如果今次係用Whatsapp send相去溝通,就唔會搞成咁。

唔係話鄭中基個頭唔好睇,但要夾人囉。理想同現實之間,總會有一大段距離。

我只係估唔到,今個個Gap會咁大。我而家只係希望,頭髮可以快啲長返…

 

內容延讀:
【藍橘子】《當唱K時「新歌試唱」一首都唔識,代表你老了》
>>> LIKE我們fb <<<
fb.com/newmonday.com.hk

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!