港男｜港男列搵女友必備7大條件：基本嘢嚟，如果唔係寧願單身！網民：不能同意更多！

女友必備條件 1：夠獨立

女友要獨立啲，唔好要人成日送返屋企。港男表示返完工大家都攰，加上好多時送完女友，平均要搭成個鐘車先返到自己屋企：「明明識自己返屋企就唔好次次都要送埋返屋企先安樂」

女友必備條件 2：唔介意食「平民嘢」

港男直言：「女人就係虛榮心，明明唔餓都話要去食high tea叫個啲三層塔又要食唔晒淨係拎嚟打卡」，更表示嗰啲high tea唔平，好多女生仲要食唔晒：「有時唔係好餓食下魚蛋粉開心下咪算囉」

女友必備條件 3：唔會理男朋友買咩

港男作為男性，想買嘅嘢通常都係一件起兩件止，例如模型、figure等。重點係呢啲嘢唔係成日出：「買嗰幾件嘢都喺到嘈嘈閉，點都好過你哋每個星期都買衫買化妝品先」。港男更表示「買figure係唔平，但認為只要畀得起錢，買完又唔會無錢食飯就無問題」

女友必備條件 4：分開社交圈子

港男認為男、女朋友嘅社交圈子，可以少量參與但絕對唔可以mix埋一齊。因為分咗手就會連朋友都無埋：唔介意女友成日去搵班姊妹開茶點會，但唔好阻止男友搵班朋友飲下嘢、打下機。

女友必備條件 5：唔會成日收貴價禮物

雖然大家都覺得情侶喺紀念日、生日、節日等互送禮物好平常，但港男就覺得：「唔洗下下都話要想貴嘢，收下心思嘢得唔得？點解成日都話要咩咩牌子銀包手袋」

女友必備條件 6：唔好要男友估你想點

港男覺得作為女友，應該有咩想講，或者唔開心應該要直接講，成日要男友估：「估唔中又要嬲，嬲完又要氹」

女友必備條件 7：未結婚唔好當正自己係屋企女主人

港男表示自己一個人住，但兩任前女友都當正自己係屋企女主人，所以覺得唔尊重：「將啲日常用品搬晒入黎都算啦，仲可以未問過我就帶埋啲八婆姊妹上黎開party」

不過面對港男列出嘅「基本嘢」7大條件，唔少網民竟然認同港男，特別係「唔好要男友估你想點」一點。

不過亦有網民覺得港男要求太多，更表示除非港男有車、有樓，條件好好，否則只要「注定單身」。