【張晨】《開始小小事都會睇醫生，開始小小事都會驚幾日》

唔會有一秒嘅危機感，唔會咁傻去諗「自己會唔會冇聽日？」

但最近，有一星期日日都頭暈，我冇以前咁「天不怕地不怕」，反而好驚「人生已完」，
每晚瞓前都好擔心……驚冇聽日。

 

諗住去睇醫生、睇專科、做Body Check，
好在最後停工數天，咩都唔做，全力休息，情況先至好轉。

好番之後，個人就冷靜落嚟，覺得前幾日自己太騰雞。

 

諗番中學時，發燒燒到傻我都冇有怕，
頂到佢自然好番為止。

而家？連熱氣搞到牙肉痛，
都以為係啲牙有事，飛去睇牙醫。

 

怕死。
我諗當一個人開始「怕死」，
大約係佢意識到自己已非「後生細仔」。

難再不藥而癒，小病唔醫會變大病；
食太多就會長肉、一斷運動就體重反彈。

 

或者係活得太耐，思想複雜咗，
遇到嘅人多咗，唔捨得嘅人都多咗；
目標遠咗，想行嘅路都長咗。
你留喺凡麈俗世嘅原因實在太豐富，
所以你怕了「離開」兩個字。

 

記得有一次，見媽媽有幾聲咳，就話想睇醫生。
我話：「你成日認住自己病咪會病囉！你諗住冇事就自然好番㗎啦！用精神力就得！」

 

諗番起呢句的確不負責任，
只恨那時自己正值壯年，無懼病痛，先講得出。

我覺得自己老了，父母則更老。

 

前幾日晚飯時間，阿媽話擔心退休之後嘅使費。

我咬埋最後一條菜：「你平時都唔多使費，又唔買名牌，唔驚啦。」
佢笑住講：「淨係呢個月，已經睇咗4次醫生啦。」
我有啲驚訝：「病咗咁多次？」
佢慢慢收起啲碗碟：「一次啫…都冇好番過。」

 

之後我發現，唔知幾時開始，
佢會收埋裝住藥嘅白膠袋。

或者係唔想畀我哋見到，免得我哋擔心。

 

以前我唔明，依家我會明，
因為我自己都已經小小事就睇醫生，小小事都會驚幾日。

而再進一步就係，
你擔心自己嘅同時，
都唔想人哋擔心自己。

 

內容由博客提供及授權轉載，不代表本刊立場。

內容延讀：
【張晨】《贏了 自尊心 ，卻輸了一個重要的人》
>>> LIKE我們fb <<<
fb.com/newmonday.com.hk