【張晨】《睇見大街中擁抱嘅戀人，你總會覺得「佢哋一定係鬧完交，個男人氹緊佢」》

內容由博客提供及授權轉載，不代表本刊立場。

扶手電梯、地鐵車廂、Sogo大門、朗豪坊長電梯……

呢啲人山人海嘅地方，有時總會見到一對戀人，喺度激烈擁抱。

每次見到呢個畫面，你都會直線地諗
「肯定鬧咗交、肯定係個女仔就喊就喊咁啦，唔係點會大街大行咁攬法？」

冇錯，「擁抱」係一個好好嘅舉動，令對方感受自己嘅體溫，化干戈為玉帛。
多數喺一場激烈吵架之後，無論有冇結果就好，
攬實佢都係一個自然加冇死嘅行為。

有時行過，你仲會偷偷斜望，睇下女方嘅眼角有冇一絲淚痕。

唔知幾時開始，你覺得「喺條街攬實對方」，已經係種難為情嘅行為。
甚至係唔需要。
要攬，咪返屋企攬過夠囉。

你認定「冇可能」，可以幫「街頭擁抱」呢個行為冠上一個罪名　—　「鬧完交」。

要將一啲自己心底覺得唔合理嘅事「合理化」，唯有加入半分主觀。
「一定係鬧咗交。」

不過你走過去偷偷望，發覺呢對情人都係甜絲絲，冇淚痕亦冇表面傷痕。

好奇怪，但諗諗下，呢種傻事自己都試過。
只係時間太久遠，你一時醒唔起啫。

究竟係幾時？係上次「熱戀期」嘅時候。

而可惜嘅係，最長嘅「熱戀期」都係學生時代，社會經驗愈多，「熱戀期」就愈短。諗嘢現實咗、對世俗眼光都介意咗。

不自覺地，我哋都冇以前咁浪漫，
到今日，估唔到連人哋嘅「浪漫」都受到自己質疑。

有啲怪責自己，再望下人哋。
呢對攬到實嘅情侶，似乎同自己差唔多年紀。
你有啲好奇：「佢哋咁熱情，唔怕啲路人目光接納唔到佢哋嘅世界咩？」

但我忘記咗，
佢哋嘅世界，根本唔需要有其他人。

或者係愛情入面，唔需要太複雜。
不過呢個道理，我哋往往要花一輩子學習。

內容延讀：
【張晨】《你的唱K必唱歌單，有轉變過嗎？》
>>> LIKE我們fb <<<
fb.com/newmonday.com.hk