寵物面相初級班

熱話

廣告

動物同我哋講唔同語言,要知道佢哋性格、心態就要靠長時間相處。

但原來有唔少寵物行為研究專家同埋識睇動物面相嘅玄學家,都嘗試根據喵星人同汪星人面型五官嚟推測佢哋性格,我哋綜合各方資料,整合出以下嘅貓狗面相初級班。

不過呢,相學呢啲嘢信就有,唔信咪冇,咪當同你嘅寶貝玩下開心下囉!

text-Jessie photo-網上圖片

 

貓貓臉型推測性格:

1. 圓臉貓

波斯貓係圓臉貓嘅典型代表,佢哋多數都較冇活力,亦都較易受驚嚇,佢偏向對信任嘅人先會表達情感。經常會留喺屋企同埋鍾意喺安靜環境同貓貓相處嘅人,較適合做圓臉貓嘅主人。

 

2. 方臉貓

緬因貓係典型方臉貓,佢哋會比較依賴主人,成日都想同主人黐埋1齊。如果係返朝9晚5穩定工作,而且好鍾意成日同貓貓玩嘅人,就適合養方臉貓。

 

3. 三角臉貓

佢哋活動力比較強,通常喺屋企都會keep住行來行去、對所有嘢都好奇,亦都比較聰明,好留意各種聲響。如果要訓練貓貓做啲特技,三角臉貓會學得比較快。

狗狗面相分析結果:

1. 嘴巴

嘴細嘅狗狗,通常細膽啲、相對於心胸都較狹窄。如果主人唔重視佢,佢可能會等主人外出後,喺屋企搗亂破壞,甚至喺主人出入嘅地方大小便!

 

2. 眼睛

好似摩天使眼睛咁大嘅狗狗,代表人氣好旺,唔止受同類歡迎,係人見到都會想同佢哋玩下,佢哋就連垂頭喪氣時都一副無辜樣,好惹人憐愛。不過,呢類狗狗比較強勢,只要主人一唔順從佢,就可能會亂咬主人衣物,俾啲顏色主人睇下。

 

3. 脷

條脷長嘅狗狗,基本上有長舌婦特質,特別鍾意吠,同埋唔容易妥協,就算主人制止佢,都會繼續據理力爭,總之要話俾周圍嘅貓狗知道佢先係最勁,唔好諗住同佢鬥。

4. 鼻

通常鼻又高又挺嘅狗狗,自我意識就特別強,絕對唔會向命運低頭。通常呢類狗嘅出身都唔低。例如鬥牛㹴、阿富汗犬等狗種個鼻就特別挺直。通常佢哋自立能力特別低。

 

而個鼻圓啲嘅例如貴婦狗,喺寵物面相學中,屬於狗眼看人低型嘅動物,覺得自己較嬌貴,其他動物根本冇得同佢比,亦較情緒化,主人要俾多啲關心佢哋。

 

鼻塌嘅狗,如西施、北京狗等等,好冇自信,尤其係當毛髮被剃咗之後,就會變得好冇心機。不過佢哋發起惡上嚟唔係狗咁品,而且較為記仇。

 

5. 身形

好似身體圓、手腳短嘅臘腸狗,頭腦較為簡單,屬於好順得人嘅狗類型,可以同主人和平共處,而且好有小朋友緣。

YOU MAY ALSO LIKE ...