台灣男神王大陸 點睇劉華柯震東？

text – Phoebe photo – king ho wardrobe – IZZUE location – Crowne Plaza Hong Kong Kowloon East

瞓覺做男一
08年入行嘅王大陸，曾演出過五月天、S.H.E同王心凌等人MV，又拍過幾部台劇，不過唔紅就係唔紅，直到金牌製作人陳玉珊開拍《我的少女時代》，試鏡成功嘅王大陸被安排去演男二，亦即係校草歐陽非凡，排戲時次次大覺瞓（佢解釋係因為老師叫大家放鬆），結果導演鍾意佢嘅演戲方式，由男二變男一，再做埋新一代男神。

「睇劇本時當然係想演徐太宇，但一開始係安排我做歐陽非凡，不過電影本來就多變數，可能導演鍾意我嘅演戲方式，因為我本身冇咩包袱，可以好搞笑，又可以裸泳，又可以好惡咁對待1個人，導演可能覺得徐太宇唔可以剩係得1個大佬樣。（覺得自己好運？）天時地利人和加運氣，演藝圈係好需要運氣同實力。（呢個算唔算遲來嘅運？）又唔會覺得等得太耐，以前嘅嘢係氧分，我好珍惜嗰6年，我6年過得幾咁辛苦，冇呢6年我根本做唔到徐太宇，應該會演得好膚淺，哈。」

唔紅但唔窮
雖則王大陸話辛苦過，但一啲都唔會係食唔飽、着唔暖、冇錢搭車或者交唔到屋租等等，因王爸爸乃知名古董收藏家。「以前會反對我做演員，因為屋企環境OK，父母會覺得演藝圈唔係正常職業。（點講服佢哋？）我要做，你咪理！我又冇同佢哋攞錢。（養得起自己？）我之前有拍戲，只係唔紅啫！我其實有賺到錢，以1個17歲普通嘅人嚟講，我賺得算超多，有拍廣告、有拍劇，電視劇賺好多㗎！至少唔使擔心自己嘅生活，可以好好去做1個演員。」作為家中獨子，有冇諗過要繼承父業？王大陸笑笑口話等自己有日好似劉華咁厲害嗰陣，一定會繼承父業，然後再投資電影。

劉德華 永遠的神

提起劉華，王大陸係以劉德華先生去尊稱，冇計，對於港星，台灣人永遠都着1份情意結，而喺呢個訪問發生前24小時，身處北京嘅王大陸先同完有份投資兼客串嘅劉德華先生一齊為電影宣傳兼合唱。「劉德華先生非常nice，每個人都會照顧到，呢啲先係真正男神，佢同我講堅持係必經嘅過程。（一齊合唱喎。）我成個人都呆咗，上台唱嗰首叫〈練習〉，係我自己本身最鍾意嘅1首歌，但我真係冇練到，開始有諗過唱〈忘情水〉，但又懶得背歌詞，怕唱錯，咁不如唱〈練習〉啦，每次去KTV都會唱，會用佢嘅唱腔去玩。自己都冇諗過佢會同我一齊唱，本身諗住唱3句，結果佢一唱，我點敢停呀？」

柯震東 真正好朋友

《我》喺台灣大收3.7億，會否超越《那些年》4.6億票房呢？真係要拭目以待。當年一片成名嘅柯震東由男神到沒落，過程都只不過係3年多，如今新一代男神出爐，2人分屬好友，能否有機會再一較高下呢？
「佢又冇咩點講，咪話我嘅時代要來，因為我同佢係兄弟，唔係同事，關係好好，我哋同另外5個兄弟成日都一齊打打鬧鬧，佢哋成日喺group講笑咁話王大陸時代嚟喇！要對佢好啲，我都有串番佢轉頭，不過呢啲留俾你自己去問佢。」正所謂紅得愈快，沉得愈快，王大陸話唔會擔心，重話自己本身睇得好開。「神太誇張喇，好男人?國民男人?哈哈！因為本身唔太care呢啲稱呼，所以冇咩壓力，做好自己要做嘅嘢，做戲大家都會支持咁就開心。」訪問前，王大陸主動上前用雙手同我握手，訪問期間，佢好幾次問我笑咩。訪問後，王大陸再次主動上前，拉一拉我隻手，然後再話：「你不要不開心。」冇喎，見到男神，開心都嚟唔切啦！或者佢都感受到筆者嘅假，繼而話：「我這個人就是有這個問題，感覺很不認真、都在嬉皮笑臉。」為表友好，筆者與男神影了N張合照，握手又再握手，膚淺又愉快地結束這個訪問。

上映日期：10月15日

內容延讀：

>松井珠理奈18解禁寫真(19P)

>中伏？優化？5個IOS 9秘密功能一定要知