使徒襲來!睇完明晒!10大要識特別名詞

熱話

廣告

時間西曆2015年6月22日晚,使徒最終冇襲來,聽日又要返工嘞!講緊乜?講緊《新世紀福音戰士(Evangelion)》劇情呀!

對好多人嚟,講今日只係又一個blue monday,但對動漫迷嚟講,今日就係不得了嘅大日子,因為2015年6月22日正是《新世紀福音戰士》(EVA)所設定嘅「使徒襲來日」。

動畫由95年開始首播,EVA直到而家仍然創造無數咁多經典神話,07年開始全新4集新劇場版計畫都未完,每逢有新嘢出都會成為日本「社會現象」。唔止動畫迷視為無法超越嘅神作,動畫監製庵野秀明更成為大師級製作人。由於內容涉及神秘學同宗教,令唔少潮人亦視為動畫聖經,要型必定要跟住睇。使徒、暴走、同步率、絕對領域等等名詞全部由此起。

事實上,由於製作費太貴,令最終幾回集數都將貨就價,最經典要數大結局《世界の中心でアイを叫んだけもの》一集,動畫內容幾乎全部都係主角碇真嗣1個人喃喃自語,不斷自問先答,提出人類到底係乜、人類點解要生存、人類應該要做啲乜等自我精神解構,哲學味濃,再穿插唔同角色喺入面,意識流到不得了。本來只係冇錢做大場面嘅結果,但就成為全動畫收視最高一集,創下10.3%收視記錄,高過日本二三線嘅日劇,絕對唔只係機械人大戰咁簡單。

EVA其中一個話題位,係內容深奧,唔係咁易睇得明,所以恕記者唔夠膽挑戰寫精讀,以免寫錯傷感情。今次揀出10大EVA要知嘅名詞,同大家懷舊之餘,等啲非粉絲可以易啲入口,你又睇唔睇得明先?

text-Nam photo-網上圖片

1.使徒
EVA入面一種神秘巨大生命體,統稱為「Angels」,來源係《聖經》故事中侍奉造物主嘅靈體。每次出現都對地球形成破壞同威脅,冇人知道使徒到底點嚟。95年動畫入面只出現過17隻使徒,並全部以天使命名,如今日來襲嘅就係第3使徒水天使SAKIEL。唯一特別係最終使徒自由天使並非TABRIS,而改名成渚薰,並且冇造成任何破壞,同時亦係故事入面重要角色。

2.初號機
「EVA機」為故事入面嘅戰鬥機械人統稱,全名係「泛用人形決戰兵器」,EVA亦即《聖經》中夏娃之意,意思亦係亞當(Adam)嘅複製體,而亞當就係第1使徒,所以只有EVA機能夠有能力打贏使徒。初號機則係最重要嘅1部,佢係唯一複製第2使徒Lilith製作而成。雖然係機械,但寄宿住主角碇真嗣媽媽嘅人類靈魂,變成有血有肉及有精神意識。喺劇場版入面,初號機暴走後能力被提升成近乎「神」,被視為第三次衝擊嘅儀式道具。新劇場版更加入「覺醒」設定……

3.暴走
每當初號機駕駛員碇真嗣有危險時,初號機就會發生暴走情況,呢個時候初號機係無敵嘅,並且能夠吞噬使徒吸收動力及進化,但同時又會失去控制。初號機首次暴走正正係今日6月22日,暴走後就將第3使徒「生食」,超級血淋淋之餘亦好經典。

4.同步率
EVA駕駛員意識需要連接機械,同步率就係用嚟顯示EVA同駕駛員之間嘅心理協調性,由1至100%,數據愈高協調性愈好,亦等於戰鬥力愈高。不過凡事有例外,碇真嗣曾經去到400%同步率,而初號機暴走時更加冇任何同步率……

內容延讀:

>使徒未來襲,但《星戰》堅打到嚟,重喺時代廣場開戰

>香港襲來!鹹蛋超人7月亞博現身

5.絕對領域
英文係「A.T. Field(A.T.力場)」,全名為「Absolute Terror Field」,但點都唔夠用「絕對(不可侵)領域」咁傳神。凡係使徒都有絕對領域,作用係阻斷、遮蔽或反彈一切來自外界嘅物質,而家會將絕對領域形容為無法對抗嘅部分,例如日本人會將少女穿着迷你裙時,條裙同膝上襪中間大腿露出嘅部分視為絕對領域,香港亦有「李氏力場」之說。唯有源自使徒嘅EVA機能夠打開絕對領域,直接攻擊使徒。

6.第二次衝擊
40億年前隕石撞地球,就係第一次衝擊,所以「衝擊」其實為極大災難,有地球重生之類嘅意思。動畫入面嘅第二次衝擊,亦可理解為第3次世界大戰,地球人口少一半。時間為2000年9月13日,一早過咗啦不過。

7.人類補完計劃
即是「第三次衝擊」。簡單嚟講,就係將所有人類以進化手段,融合成1個單體生物,人心之間就可以互相補完。但由於概念同實行上實在太複雜,加上原著入面個個都各懷鬼胎,有唔同嘅人類補完計劃,就算動畫都未必交待到好清晰。何況EVA用咗20年都係講緊人類補完計劃嘅故事,所以我都無謂多講。

8.綾波麗
個個都唔講,都要講綾波麗。EVA其中一個女主角,亦應該係最多人認識嘅女性動畫角色之一。由於初期身份神秘,後期穿橋後又令人有極大衝擊,所以非常有爭議性。其實佢係第2使徒光之巨人Lilith嘅靈魂宿主,動畫亦暗指佢係碇真嗣媽媽嘅複製人,並非「人類」。

9.黑底白字
EVA開咗好多動畫先河,甚至喺藝術層面上都有一定地位,佢用咗大量長時間嘅畫面靜止、每集片頭嘅「黑底白字」擺位法、大量嘅快速畫面閃現效果等等,如最後殺死渚薰時,畫面定格差不多成分鐘冇對白冇音樂,非常黐線。另外每集都用黑底白字做片頭亦係經典中嘅經典,到而家都仍然好多人玩緊。

10.Decisive Battle
話EVA嘅OST(Original soundtrack)係世界級絕對冇誇張,特別係戰鬥主題音樂〈Decisive Battle〉,列作動漫史上十大經典都不為過,衍生出暴走所用嘅OST《The Beast II》亦係非常有氣勢。而主題曲〈残酷な天使のテーゼ(殘酷天使)〉及片尾曲〈Fly Me To The Moon〉更係唱到街知巷聞。一句講晒,識嘢嘅一定會聽埋啲音樂。

https://youtu.be/K05gPSrsE-c


內容延讀:

常見問題

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!

關鍵詞
EvaEvangelion

YOU MAY ALSO LIKE ...