【最緊要健康】5件有損健康嘅時尚單品

熱話

人人都鍾意靚,咁我哋當然會買好多時尚單品襯衫,而且重會緊貼潮流,買時下好興嘅單品,不過靚還靚,都唔可以「愛靚唔愛命」,1件衫或者1個手袋,分分鐘會成為隱形殺手,有機會令你肌肉勞損,或者會令你神經受壓,係咪聽到都驚驚哋呢?唔怕,而家即刻同大家解構邊啲時尚單品隱藏住健康危機,等你做個健康嘅潮人。

text-Swing(ig:nganshuwing) photo-互聯網圖片

1. Skinny Jeans

月前,澳洲就有個女人着住緊身褲長時間蹲低做家務,執下個櫃桶,之後就突然間覺得雙腳劇痛,去到醫院,佢小腿已經嚴重腫脹,醫生話要剪開條褲,先救到佢,因為佢患上咗「骨筋膜室綜合症」,對腳壓力過大,影響血液循環,同時令到肌肉腫脹,着緊身褲更會令到腫脹嘅肌肉「無碇走」,所以你都咪話唔驚。

 

2. 細半碼嘅內衣

係女人都想有條事業線,有啲女人為咗條深長嘅事業線,會選擇着細半碼嘅內衣。不過咁樣係對身體完全無好處,因為着細半碼內衣會影響你呼吸頻率,而不暢順嘅呼吸係會影響大腦供氧能力,氧氣供應不足,我哋嘅抗壓能力就會減弱,所以細半碼嘅內衣真係唔好成日着,着一次半次就好啦!

 

內容延讀:

【女神必備】一對潮 耳環 ,帶你由hea變grand!

估佢唔到 Supreme新一季 學星爺《國產凌凌漆》玩保健球問你做唔做?

3. 大手袋

 

係人都知女人個手袋出名多嘢,化妝品、電話、銀包、書、相機…… 總知我哋就鍾意帶晒佢哋出街,所以冇番咁大個袋係唔得嘅,但係拎住咁大個袋,你嘅頸、膊頭同脊椎所受嘅壓力,你又feel唔feel到?因為你拎住個咁大咁重嘅手袋,你嘅頸、膊頭同脊椎就好自然咁斜埋一邊,時間耐咗就會加速你脊椎老化,而膊頭嘅肌肉都會勞損。

 

4. 高踭鞋

着咗高踭鞋之後,雙腳望落去好修長,個人整體靚咗,人都有自信心!不過着高踭鞋,將大部分身體重量都俾晒前腳掌,而且身體重心自然會向上移,脊椎壓力增加咗。重有,腳趾長期受壓,耐咗就會令腳趾或者腳掌變形,而好多女生都有嘅拇指外翻更加係長期着高跟鞋所致!如果因為想着高踭鞋,睇落去對腳靚啲,而令到拇指外翻,咁就唔抵啦!

 

5. 粗腰帶

我哋又好鍾意用粗腰帶襯衫,咁樣望落去個身形都會瘦啲!不過太緊嘅粗腰帶會令腰部嘅肌肉處於緊張狀態,令到入面嘅內臟成日被壓住,內臟受壓,新陳代謝就會減慢,消化功能都有一定嘅影響!所以大家都係用返啲幼細嘅腰帶,咁樣大家先會健康架嘛!

YOU MAY ALSO LIKE ...

There is 1 comment

Add yours

Comments are closed.