MC張天賦鍾意搞人老婆？八字命格分析近年持續三角關係

Jan 12 2022

近日MC張天賦可謂是非不斷，除咗捲入Ash鍾卓穎緋聞風波，早日又被網民發現疑似搭上網絡KOL「FHProductionHK」成員Santis，亦即係大家所熟悉嘅熊仔頭「疑似老婆」。一連兩次同人地老婆出街行超市，有唔少網民認為MC張天賦有特別癖好，為求探究MC真實性格，今次我地搵嚟玄學家分析一下張天賦八字命格，睇下得出咩結果。

MC張天賦鍾意搞人老婆？八字命格分析

1996年12月1日出生嘅MC張天賦，五行屬壬水，水向來係五行中「需求」最大嘅屬性，尤其是壬水，圈內水型男士例子有陳冠希、周永恆等。至於水型男士天生玩世不恭，唔鍾意沉悶又坐唔定，鍾意有玩味性及帶刺激感事情，一般都比較「大細路」，而且水型男比較口甜舌滑，有啲更經常講大話。另一方面，MC張天賦命格夫妻宮為丙火，代表佢係外貌協會，認為女生嘅外表比性格重要。

被網民發現疑似搭上網絡KO「FHProductionHK」成員Santis（圖片來源：連登討論區）

周旋三角關係

MC張天賦正處於壬寅比肩大運，一方面代表佢從事娛樂圈會有好多忠實fans，由近期佢嘅成績可得知。另一方面，壬寅比肩大運同時代表佢近年會比較多複雜三角關係情況出現，例如佢愛上有另一半嘅女生，或者有另一半嘅女仔鍾意佢又得，甚至佢同其他人鬥追一個女仔亦可，總之近年常周旋喺呢種關係入面。值得留意嘅係，踏入虎年後，MC張天賦同樣走入壬寅比肩流年，代表佢今年有更多三角關係，唔知會唔會又被網民發現呢？

MC張天賦八字反映創作力高

不得不提，MC張天賦八字上反映創作力高，首先日柱得令，代表能力及把握力高。再者，壬水亦代表創作力及有天馬行空思維，加上MC張天賦於壬申日出生，大大加強佢藝術細胞，唔做音樂或藝術就真係嘥晒。另外佢有「才官雙美」格局，代表佢有責任心，同時適合多方面發展，不妨歌、影、視三線發展，可以有唔錯表現，希望之後大家會留意MC張天賦嘅實力多過佢嘅緋聞啦。