抽獎

打工仔返新工抽獎即中大獎 轉頭辭工竟然遭老闆迫令「還獎」 小器公司再有新動作追討

網絡熱話

有打工仔早前一返新工,就喺新公司聖誕Party抽到終極大獎,但好快就有新Offer而辭工,竟然被要求交還獎品,仲威脅喺人工扣錢。事件本身已經係肉酸又小器,令一眾網友側目。公司方面近日準備有新動作,繼續迫使打工仔「還獎」。網友今次大反轉,反而希望公司搞落去。

撰文:Yin|圖片來源:Facebook專頁「奴工處」,tvb劇集《愛回家之開心速遞》劇照

抽獎
(圖片來源:tvb劇集《愛回家之開心速遞》劇照)

打工仔返新工第2日抽獎 竟中$3萬電視

事情起源喺舊年12月19日,一名打工仔入職新公司,第二日就係公司聖誕Party。點知咁好彩,打工仔新入職,就抽中咗終極大獎,係一部價值$3萬嘅電視。

打工仔喺同月23號收到更好工作Offer,於是決定辭職轉工。估唔到,老闆竟然記住打工仔嘅中獎,叫人事部要求打工仔交還大獎嘅電視,否則就會扣人工。

抽獎
(圖片來源:Facebook專頁「奴工處」)

網友踢爆公司抽獎制度本已有利舊有員工

事件當然引起網友熱烈討論,大肆批評公司小器又肉酸。相隔大約一星期,事情再有新進展,依間小器公司嘅員工再次向「奴工處」爆料,進一步披露公司嘅小器作風。

爆料員工補充返,聖誕Party嘅抽獎原來本身都唔係公平,唔係人人機會均等,而是採用所謂「年資加權」,即係年資越長,放入抽獎箱嘅飛就越多,例如入職未滿一年就一張,做夠一年就加多一張,如此類推。所以,新入職打工仔能夠在云云員工被抽中,真係極之幸運。

抽獎
(圖片來源:tvb劇集《愛回家之開心速遞》劇照)

為求討回抽獎獎品 公司擬對打工仔出律師信

除咗解釋返抽獎機制,員工仲披露公司為求追返部電視,準備再有動作。人事部就同老闆講明,公司如果為攞返送出嘅電視而扣糧,會畀人告。於是,老闆就改向公司法律部門埋手,叫法律部門出律師信畀打工仔,表明唔肯交還電視的話,就小額錢債審判庭見。

抽獎
(圖片來源:Facebook專頁「奴工處」)

網友籲開名 讓大家知道抽獎中咗要嘔返出嚟

對於公司如此小器嘅舉動,網友都為之不齒,仲呼籲「開名」,等大家都知道依間公司抽中獎係要嘔返出嚟;網友又話,可能一開公司,小器老闆第二日就會送多套音響出嚟,請求打工仔原諒。唔少網友都話,就等公司真係出律師信,睇吓係咪可以嚇到打工仔。

抽獎
(圖片來源:Facebook專頁「奴工處」)
抽獎
(圖片來源:Facebook專頁「奴工處」)
抽獎
(圖片來源:Facebook專頁「奴工處」)

網友就唔信公司夠膽扣糧,否則公司已經會畀人告,因為返工係出糧,唔係出電視,到時就真係法庭見。

抽獎
(圖片來源:Facebook專頁「奴工處」)
抽獎
(圖片來源:Facebook專頁「奴工處」)

網友估計公司規模唔細 卻連一部抽獎電視都斤斤計較

有網友慨嘆,如果一間公司有Legal Team(法律團隊),規模應該唔會好細,但連一部電視都要如此斤斤計較,似乎係為啖氣,多過為錢。仲有網友話,好在依間公司唔係馬會,否則中咗獎「割禾青」就迫人還,唔肯還就要告人,仲有邊個敢買馬。

抽獎
(圖片來源:Facebook專頁「奴工處」)
抽獎
(圖片來源:Facebook專頁「奴工處」)

YOU MAY ALSO LIKE ...