Apple Watch之前……一早大把勁表啦!

Apple Watch剛現身,很想要吧?
正所謂人類科技一日千里,其實幾十年前嘅科學家/ 夢想家/ 作家,就已經設計過唔少天馬行空嘅鬼馬智能手表。

以下10隻智能手表,有舊有新,有真有假,但你咪理,人哋發明嗰個起碼夠大膽創新先吖,你覺得邊隻設計最癲?

Text-Oscar

1. Linux Watch
呢隻貌似玩具手表,真係劃時代嘅智能手表!佢係IBM喺2000年推出嘅Linux Watch,可以執行Linux操作系統,重有8mb ram同8mb儲存空間,同小型電腦有得揮,喺當時嚟講,係航天科技級嘅產物嚟!

2. 鹹蛋超人視像電話
話明係鹹蛋超人,即係外星人啦,佢哋嘅科技一定先進過我哋好多。所以喺48年前,喺《鹹蛋超人》嘅片集裏面,守衛隊就已經有「視像通話」表,重要係HD高清兼16:9闊屏幕,好鬼有前瞻性。但我成日都諗,傾傾下突然會被怪獸一腳踩落嚟……

3. 生化手表
喺人體嘅皮膚同肌肉之間植入手表變成生化智能手表,呢啲槪念喺好多卡通同電影如《Matrix》同《攻殼機動隊》都有,如果有日真係出現,你又夠唔夠膽用?

4. 占士邦萬用手表
眾多電影人物之中,007占士邦絕對係男人嘅偶像,事關佢除咗好身手、西裝骨骨,重有同佢出生入死嘅奧米茄手表。當然,阿占兄戴嘅並唔係一般嘅奧米茄,佢嘅手表可以整斷條繩、吸實金屬、收fax,甚至發射死光,功能真係多過Victorinox瑞士軍刀!

5. 「天眼」智能手表
近排TVB播緊《天眼》,講用天眼嚟監視人,圖中呢隻占士邦嘅手表可以話係天眼嘅始祖,由攝錄機拍嘢,再喺手表直播影像,不過監察嘅目標好似同國防機密無關喎……

6. 精工高科技電視表
經過占士邦嘅啟發,Seiko真係推出過1款影像表,透過老牛咁大隻嘅接收器,可以手表睇電視。不過呢,大家睇廣告(左邊)嘅畫面就靚爆鏡,但實際出嚟嘅效果就……而家有商品說明條例,我買咗實告硬佢。

7. 第1代「note pad」
智能手表未推出前,如計數惟有靠心算,於是Seiko推出呢隻「計數表」,唔止加減乘除,配搭埋外置組件,重可以當計數機同note pad用,已經夠晒劃時代。

8. 幪面超人變身表
喂,鹹蛋超人有手表,幪面超人都有,重可以用嚟變身成拯救世界嘅英雄呀!

9. Wrist Watch
7、80年代出世嘅人,記唔記得有輪好興用手表打賽車、田雞過河嘅games呢?最正係可以趁父母瞓咗靚雞雞匿喺被竇繼續打!不過呢隻《街霸》Wrist Watch點出波呢?

10. 真正蘋果表
喂,呢隻真正嘅Apple Watch,優勝之處係肚餓可以用佢嚟充飢?

11. 同場加映 強國Apple Watch
話明強國,當然全世界最強,有報道話今日(冇錯,係今日),深圳嘅華強北路同淘寶網已經有Apple Watch上架,重要300蚊人仔咋,喂,唔好執輸啦!

YOU MAY ALSO LIKE ...