7、80後先識 10大懷舊童年玩意

正所謂「懷緬過去~常陶醉~乜乜物物」。

如果你成日講舊時,證明你年紀有返咁上下。亦好可能係對住而家個政府、社會咁多光怪陸離嘅人同事,好難唔令人經常諗番以前嘅good old days。

就算以往物質無而家咁充裕,啲玩具亦好low tech,但就係玩得津津有味。以下呢10大經典小玩意/零食,應該係7、80後先識。你有無玩過?又有無勾起好多回憶?

text-專題組 photo-網上圖片

1. 金絲貓

北京人興鬥蟋蟀,我哋啲港仔就鍾意玩金絲貓——講緊並唔係金髮洋妞,而係個性兇猛好鬥,學名豹虎嘅蜘蛛。

金絲貓喺8、90年代好受當時學生歡迎,會偷偷哋帶返學校玩。之所以咁盛行,因為完全唔使錢,只要襯落雨之後跑去動植物公園,搵啲兩塊黐埋嘅葉搣開就有機會見到金絲貓藏喺中間。

 

2. 仁丹

「仁丹,芬芳氣味,令我感受清新…仁丹美味又提神,更舒心中悶快~好比清風一陣令你舒暢!」

我諗無乜邊個80後冇睇過呢個仁丹廣告同聽過呢首洗腦廣告歌。仁丹當時標榜自己係健康食品(有益腸胃),係香口膠以外最popular嘅「口立濕」食品,不過由於太似白鳯丸,所以都係女仔食多。

 

搵唔到港版廣告,睇住日版頂住先:

 

3.啪啪紙手槍

膠製玩具子彈,1圈有8發,每發都藏有少量火藥。將子彈放入玩具槍之後,可以發出同真槍差唔多嘅槍聲同火光,重會聞到一陣火藥味添!不過當時好似有細路被呢啲啪啪紙爆出嘅火光整傷眼,所以喺香港「啪啪紙」被列為違禁品。

 
內容延讀:

【波鞋狂熱】本週5大全力必買新鞋

全身執!夏日潮LOOK 編輯部推介今週必買5大潮物

4.扭計蛇

同扭計骰一樣可以扭嚟扭去,由24個相連嘅直角三角形柱體組成,玩法係可以將佢扭成狗、蛇、烏龜等動物,重可以用多個合併整出更複雜嘅嘢,當年可樂公司除咗出搖搖之外,亦有出過扭計蛇。

 

5.摩打潛水艇

塑膠玩具,下面個摩打用筆芯電推動,當時嚟講已經好高科技㗎喇!好似好犀利咁樣,但電池同摩打位好容易入水,玩兩嘢就會壞鬼咗。

筆者當年試過帶去公眾泳池玩,被教生員叔叔鬧到飛起!

 

6.唧唧冰

而家都重有類似嘅化學果汁冰零食,但通常都只係用膠套裝住,好似呢種包裝咁嘅應該已經絕跡,佢最吊癮之處在於,好多時點啜都啜唔到啲冰,吸到個口同條脷抽晒筋。

 

7.樓梯企鵝

以前嘅機械玩具冇而家咁厲害,不停重複做同一樣嘅玩具都幾常見,呢款上樓梯再瀡滑梯嘅企鵝玩具係其中之一,冇乜嘢可以玩到,但望住佢哋重複又重複咁樣,好似好得意,當年幾乎每個細路都擁有一套。

 

內容延讀:

睇咗未先?爆笑得嚟有深度嘅《他約我去見牟尼》MV

《復仇者聯盟2》AVENGERS2 激似動作替身逐個捉

首爾街頭逐個捉!10個韓妹波鞋LOOK

8. 5亳子扭蛋膠公仔

而家嘅扭蛋要幾精美有幾精美,而且重愈嚟愈貴,有啲去到可以食餐飯嘅價錢。以前就成日都會去扭呢種膠公仔,只係5亳子隻,特色係啲扭蛋殼好鬼細個,啲膠公仔成日都迫到扭埋一舊先放到入去,抽到攞返出嚟都孿晒,好鬼搞笑。

 

9.賽車電玩

而家嘅電玩已經發展到好強勁,以前呢種有軚盤嘅賽車遊戲機,玩法只係左右避車,好簡單,條路道行極唔完,無窮無盡咁長。但能夠擁有1部,喺同學面前特別威威。

 

10.朱古力煙仔

之後都有發展到煙仔糖嘅版本,細個會想扮大人,睇電視見到啲人食煙,就覺得係大個嘅象徵,就會有樣學樣。正正經經咁食都冇咩事嘅,如果食到食煙咁嘅款,都係會換嚟被阿媽摌嘅命運。而且呢隻朱古力「好睇」,絕對唔好食。

 

內容延讀:

【波鞋狂熱】本週5大全力必買新鞋

全身執!夏日潮LOOK 編輯部推介今週必買5大潮物

YOU MAY ALSO LIKE ...

There are 4 comments

Add yours
  1. 新Monday / 台北《One Piece》跑 海賊王激筍選手包完全睇 - 新Monday

    […] >睇完時興動漫都睇下7、80後先識嘅10大懷舊童年玩意 […]

  2. 新Monday / 【多啦A夢悲報】大雄夢想成真 胖虎甩頭死亡! - 新Monday

    […] >7、80後先識 10大懷舊童年玩意 […]

  3. 新Monday / 小小Lego超人狼人 擁有大大力量! - 新Monday

    […] >7、80後先識 10大懷舊童年玩意 […]

  4. 新Monday / 長洲戲院懷舊大笪地 4大必食經典小食 - 新Monday

    […] >重有7、80後 10大懷舊童年玩意 […]


Comments are closed.