「兄弟的典範」 醉酒平頭男邊喊邊做人工呼吸
廣告
好多人話飲完酒會講真話，唔知呢位嚟自河南嘅男子酒後做嘅行為係咪都出自真心呢。河南鄭州嘅3名男子被人拍到喺飲酒嘅時候，其中1人疑因不勝酒力，需要躺喺膠椅上面閉目休息，另一位飲醉嘅平頭男子見狀，竟然以為好友「快要死掉」，只好一邊喊一邊大叫求救，仲抱住佢做人工呼吸。
飲醉抱住友人嚎啕大哭「強吻」
事發喺本月19日晚上，河南鄭州嘅3名男子相約去到露天地方飲酒，1名黑衣友人飲多咗幾杯後打算閉目休息一會，然後另一位疑似飲醉嘅平頭男因受酒精影響，誤會好友係飲酒太多而「死掉」，情急之下平頭男立即抱起好友，不停大叫要救回友人並且一直嚎啕大哭，平頭男期間不停拍打好友嘅身體，一個失足兩人一同跌倒喺地下，但平頭男仍強忍醉意撐起身體，捧起黑衣男友人嘅面，靠近友人進行嘴對嘴嘅人工呼吸，就算期間黑衣男友人有出手阻擋「強吻」，平頭男仍然無理友人反抗，最後係黑衣男意識逐漸清醒自行坐立先擺脫平頭男嘅「熱情搶救」。
平頭男獲大讚 網民：「兄弟的典範」
影片曝光後網民都紛紛表示平頭男係「兄弟的典範」，由此證明咗兩人嘅深厚感情，網民都表示支持：「你覺得尷尬，我覺得感動」、「這兄弟交得值了」。不過唔知佢地酒醒清醒之後面對大家又會有咩感覺呢。
圖片來源：微博影片截圖
