《狂野時速》 10大秘聞你要知

熱話

買咗飛睇《狂野時速7》未?定還是已經睇咗?今集主角之一嘅保羅獲加離世而添上一層特別意義。其實自2001年開始,《狂野》系列幾乎係票房同口碑保證(除咗第3集),多年結集咗大量忠粉。咁啱你都係?以下10樣《狂野》秘聞,你又知幾多樣先?

text-專題組

《狂野時速7》預告片

1. 《狂野》個個主角都係飛車高手,能人所不能,現實又如何呢?

原來喺第1集開拍前,導演嫌打女Michelle Rodriguez 同保羅獲加嘅戲中女友、Jordana Brewster手車太屎,要佢哋去跟賽車高手「補鐘」。而第2集主角之一嘅名模青木迪芳,當時更係「零」駕駛經驗—–因為佢根本冇車牌。

 

2. 不過主角當中亦有真賽車高手,佢就係保羅獲加,佢係賽車發燒友,重有份幫《狂野》系列揀選電影中適用嘅賽車,而第2集一開始佢揸嘅車,原來真係佢現實中用嚟賽車嘅私伙嘢。

 

3. 第1集選角嗰陣,保羅獲加戲中女友Mia嘅角色,原來被一眾巨星爭崩頭﹕有《黑天鵝》嘅Natalie Portman、前「蜘蛛女」Kirsten Dunst同被譽為最性感嘅荷里活女神Jessica Biel。但最終爆冷被當時只係奀星嘅Jordana Brewster冷手執個熱煎堆。重有喎,原來最最最初Mia嘅角色第1人選係超級奀星Eliza Dushku(你唔會識吓嘩?),但就被佢拒絕咗~~~運氣嘅嘢,有時真係捉都捉唔住。

 

4. 同樣地,第1集選角時,保羅獲加嘅角色「Brian O’Conner」,亦有唔少巨星如蝙蝠俠Christian Bale、Rap霸Eminem同大隻佬Mark Wahlberg都喺角逐名單之內。

 

5. 《狂野》系列其中1個中心主旨,就係主角們互相扶持,戲中主角成日強調佢哋係一家人。卻原來當中兩位主角﹕保羅獲加同飾演Letty嘅Michelle Rodriguez喺整個系列中,只有一次對話—-就係《Fast & Furious 6》中ending,Brian 走埋Letty度向佢道歉,而Letty就話﹕「I may not remember anything, but I do know one thing. Nobody makes me do anything I don’t want.」係咁多喇!

 

《狂野7》Michelle Rodriguez同MMA女子冠軍Ronda Rousey對打。

6. 講開打女Michelle Rodriguez,戲裏戲外嘅佢一樣強硬,喺某個訪問中,佢回想第1集拍攝時,初初接觸其他主角嘅第一印象,佢話佢無個睇得順眼。「保羅獲加成個芭比公仔嘅男友Ken咁,好乸囉,飾演佢女友嘅Jordana就係個神經質嘅傻婆,而雲迪素就更加係個仆X!不過接觸咗佢哋咁耐就證明我嘅第一印象錯晒啦,哈哈!」

 

7. 被喻為最失敗嘅1集—-《狂野3》,其中1個失敗原因係套戲完全易角,原來因為片商當時覺得保羅獲加「好老」!!!!而當時片商亦叫編劇寫咗兩個版本嘅劇本﹕一個係有雲迪素嘅角色,另1個係冇,因為當時佢哋怕雲迪素扭計加人工喎!

 

《狂野7》「飛」車特技解構

8. 雖然《狂野》系列係用咗好多C.G.幫手加強飛車場面嘅刺激度,但據系列導演Justin Lin話,若果可以,佢想盡量以真正嘅飛車特技拍攝,因為真實感比電腦C.G.強好多咁話。好似《狂野3》嘅飛車特技,就總共撞爛咗超過100部車,而《狂野6》坦克車同跑車追逐嗰段重頭戲,亦幾乎無用過C.G.咁滯,全部真車上陣。

 

9. 《狂野》嘅英文戲名﹕《Fast & Furious》好鬼型,但原來最初編輯諗過用《Racer X》、《Redline》、《Race Wars》,真係聽到都覺得娘。

 

10. 雲迪素飾演嘅Dominic,佢嘅專用跑車 RX-7原裝係有個賽車金屬車架嘅,但因為雲迪素太大隻坐唔落,所以要拆咗佢。

 

重溫咁多集預告片

YOU MAY ALSO LIKE ...