日本網友教食 糧頭糧尾勁到核爆大餐

日本網友教食 糧頭糧尾勁到核爆大餐

「糧頭一條龍,糧尾一條蟲。」正正係人工永遠趕唔上通脹嘅打工仔寫照。

尤其有啲大使嘅打工仔,月頭出糧使大咗,到糧尾真係食樹皮都唔掂。

日本有位網民としきん喺網上上載多套「糧頭vs 糧尾」食譜,以差唔多嘅材料,例如cheap嘅雞皮做糧尾食材、霸氣巨型雞脾就做糧頭食材咁,煮出兩款為1 pair嘅菜式。

你齋睇糧頭或糧尾是旦一張相可能會覺得冇乜特別,但兩張相一拍埋絕對係極端到令人爆笑,完全感覺到佢「終於有錢使喇」嗰種興奮嘅心情。

text-專題組photo-網上截圖

 

1. 雞髀似牛髀炒飯

糧尾雖然唔使折墮到食紙皮,但雞皮就難免囉,都好吖,有啲煎香咗嘅雞皮吊下味唔使齋飯咁dry。

而糧頭就梗係威啦,隻雞髀重要大到好似受咗幅射影響,牛髀咁大先夠霸氣。

 

2. 西蘭花樹牛肉飯

而家啲肉貴成咁,糧尾食真係食自己忽肉好過啦,清清地食下啲菜頭菜尾咪當清下腸胃。

喂,糧頭又唔係咁講法,有cash喺手全碟肉都重得,再將成棵西蘭花唔切好似棵樹咁插喺中間先夠巴閉。不過我哋中國人有個傳統就係直插啲餸或筷子喺碟飯上面俾先人食嘅,真係大吉利是。

 

3. 心臟病人士早登極樂肉慾卷

糧尾想食啲卷物乜乜乜,咪用啲雞皮包西蘭花莖過下口癮。出咗糧嘅霸氣卷就梗係用牛扒包吉列豬啦,不過咁heavy,如果心臟病人士食都唔知等唔等到下次出糧囉…

內容延讀:

睇完創意食譜,再學埋9個令雪糕加倍邪惡嘅食法

睇埋同樣嚟自日本 中村藤吉降臨海外首間

4. 跌乜蟹落海鮮粥

無錢想食海鮮粥?搵啲假蟹柳頂住先啦,冇蟹都有蟹味。出咗糧就梗係成隻皇帝蟹隊落個煲度煮啦,最緊要隻丁乜蟹大到連個煲都裝唔晒跌出嚟先叫威嘛!

5. 油淋淋牛扒串燒

糧尾想食串燒就買啲雞腿肉,將佢片到紙咁薄再配上蔥頭咪可以窮風流囉。月頭大魚大肉就梗啦,你試過兩大塊牛扒嘅串燒未吖?

6. 毛蟹全體壓死麵

糧尾時煮嘅拉麵用魚餅配粟米,啲粟米重要數得出有幾多粒,無計啦,要慳啲使。出咗糧就買原隻毛蟹隊落去碗麵度啦,但咁咪食唔到麵囉?

內容延讀:

睇完創意食譜,再學埋9個令雪糕加倍邪惡嘅食法

睇埋同樣嚟自日本 中村藤吉降臨海外首間

7. 堅乜挺牛扒意粉

肉醬意粉用肉醬係好正常嘅事,糧尾煮呢款真係又平又頂肚。有錢嗰陣?就梗要食個牛扒皇冠意粉,話事話,成到個意粉咁挺身咪好硬好難食?

8. 勁到核爆蘑菇雲松茸牛柳粒飯

糧尾有碟頭牛肉飯食已經好正啦。糧頭呢?有巨型蘑菇松茸加牛柳粒,浮誇又富貴,啱我。

9. 昨夜飯桶燒雞

糧尾嗰碟雞飯,係冇雞嘅,只有雞湯麵味粉,啱晒雞汁May姐。而出咗糧之後就將飯直接釀入成隻燒雞度,食得咁豪,難怪成日出糧前都要咁慘…

內容延讀:

睇完創意食譜,再學埋9個令雪糕加倍邪惡嘅食法

睇埋同樣嚟自日本 中村藤吉降臨海外首間

10. 土豪龍蝦天婦羅乾崢崢烏冬

糧尾食咩已經唔係重點,因為佢出糧日後整嘅嗰碗烏冬,真係太誇張,原隻炸龍蝦天婦羅,真係土豪先會食。

 

11. 牛扒冚包散

佢嘅對比真係好鬼極端,月尾食麵包皮,出咗糧,就成條麵包食,係想彌補番自己心理嘅意思嗎?

 

12. 小橋喉水牛扒冷麵

冇budget但又想食流水麵,用水龍頭直接沖水呢個做法都幾有創意。但係出咗糧之後,有竹整流水裝置之外—–又加扒?呢個日本仔真係前世未食過牛扒?

 

YOU MAY ALSO LIKE ...