想捕獲短尾鼠selfie 10件事你要知

近來社交網瘋傳一輯外國人喺澳洲「野生捕獲」短尾矮袋鼠(以下簡稱短尾鼠)兼同佢selfie嘅相片。呢班袋鼠被喻為「世界上最快樂動物」,皆因成日「笑騎騎」,可愛爆燈兼且唔怕人類,同佢哋selfie嘅開心度,唔會比同發哥selfie低。

前排我哋都post咗呢輯相上NM facebook,有好多讀者都問,到底點樣可以捕獲呢班可愛友selfie?好啦好啦,我哋搵嚟10件可以同短尾鼠selfie嘅秘訣同佢嘅資料,大前提係……大家要買張機票飛過澳洲先。

Text-Oscar

1. 同貓星人體積相若

短尾矮袋鼠嘅英文名叫Quokka,係袋鼠科嘅哺乳類動物,一般身長40至90cm,尾巴長25至30cm,體重約2.5至5 kg,同1隻成年貓星人差唔多。

2. 下午易捕獲

短尾鼠係夜間活躍嘅動物,日頭通常會聚埋一齊瞓覺,有專家建議喺下晝去佢哋嘅「蒲點」,就會較容易搵到幾隻啱啱瞓醒嘅短尾鼠合照。

3. 家住澳洲西岸

短尾鼠居住喺澳洲西岸嘅Rottnest Island,呢個島係當地著名嘅度假勝地,只要喺柏斯(Perth)坐30分鐘小輪就去到。

4. 彈跳高手

短尾鼠同其他袋鼠最大分別,係佢哋後腳短但非常有力,就算身體肥嘟嘟,都可以輕鬆跳上1.5米高矮樹,彈跳力驚人,真係勁過NBA入樽王Zach LaVine。

5. 係食齋嘅

短尾鼠係草食性動物,主要食草、葉、果實同根莖。

6. 飲自己尿尿

由於生活喺乾旱地區,短尾鼠天生係「捱渴高手」,可以幾個月都唔飲水。不過佢哋亦會咬開仙人掌飲其汁液,或者自己挖水坑,甚至會飲自己嘅尿尿以求生存。

7. 唔怕高溫

唔好睇短尾鼠毛茸茸咁,佢哋好捱得高溫嘅,能夠適應高達攝氏44度高溫。

8. 平均壽命5歲

短尾鼠BB懷孕4週出世,之後喺媽媽個袋生活約半年,之後就會爬出袋生活,但仍然會返去媽媽度到食奶,直至1歲就可以獨立生活,佢哋平均年齡為5歲,但有啲可長達10歲。

9. 唔怕人類

短尾鼠唔怕人類,有時重會主動走埋你身邊,但記住只可以用相機「野生捕獲」佢哋,唔好真係捉佢哋返去養,因為近年有啲不法商人捉咗好多短尾鼠販賣,令到佢哋數目不停下降。

10. 《Instagram》最多可愛selfie相

如果你未有機會去澳洲住,可以上facebook同《Instagram 》search「quokkaselfie」,就有大把可愛嘅短尾鼠selfie相俾你止住癮先,兩者中又以《Instagram》勁多。

YOU MAY ALSO LIKE ...