懷舊不死 手提超任 隨身chok波

近年一股懷舊熱潮極速煲起,唔止係NIKE Air Max 95,就連遊戲界都離唔開翻炒懷舊,信和電氣良品亦聞到味,近年開始大手喺日本中古市場搵舊games,講緊舊到去世嘉5代、超任嗰隻,擺明唔係俾90後買,偏偏好似記者咁嘅一班7、80後大細路樂此不疲,因為我哋細個打機多數玩老翻,亦未必齊games,所以而家有經濟能力自然買乜都得,結果成功做到香港中古市場,曾經試過有隻超任game《電精》賣到$2,000,比日本情況重癲!有中古games自然要有機先玩到,其實喺香港要買部超任絕對唔難,不過要好似呢部 手提超任 pokeFAMI DX BLACK EDITION咁可以攞出街玩,直插餅《街霸2》落部機就可以周街chok波,應該得佢先做到。

text-Nam photo-Kei

駁電視玩雙打
都話潮流興縮細,有大芒唔玩係要玩細芒,就係貪佢帶得出街。呢部由日廠GameJoy推出嘅pokeFAMI,外形似足超任手掣,經典ABXY掣跟足,中間就係3.5吋螢幕,亦有內置喇叭,基本格局同超任真係相差無幾,但佢重特別到有埋3段亮度調節,更預留插口做TV輸出,並且跟adapter俾你外駁超任手掣玩雙打,十足迷你版超任。實試按鈕手感好好,十字掣冇超任咁正,但仍可接受,成部機較厚係致命傷,握感只屬一般,個人就幾buy佢插帶時張遊戲貼紙會對住你,觀感更靚,呢啲屬於設計上嘅細節嘢,加分。

售價:$799

查詢:電氣良品 旺角信和中心閣樓M18、M19-20、B39 / 2782 0978

話你知中古game咩環境
帶部pokeFAMI返屋企試,同事見到個個爭住跟機兼問價,話之你潮到成檯波鞋定一頸Goro’s,打機呢啲嘢就係共同回憶。個人意見,機價幾舊水合理抵玩,最要考慮嘅位其實係game帶。超任帶大大餅難儲亦要保養,放入盒當然最好,不過中古games未必齊件,另外一般game雖然係100蚊內有交易,但如果係超罕或受歡迎嘅games,價錢可以高到好誇張,如《娛樂金魚眼》、《Mario Kart》呢類神作更加係可遇不可求,日本都難買。不過若然只係過過手癮,冇話諗住收藏炒價,一千幾百真係唔使諗,出手啦!

YOU MAY ALSO LIKE ...