快過藤原浩 教你自改Apple Watch型格皮帶

Apple近年最矚目嘅新產品Apple Watch,準時喺4月24日出貨。《新Monday》一大班運動潮友,又鍾意追新科技,如果話你知唔期待、唔好奇,點都講唔通。不過,Apple Watch唔再神秘確係事實,由外形、基本功能,到各版本嘅分別,相信大家早就清楚晒。要衝擊大家視覺,唔黐線、唔有型,都好難引到你睇。
條橋是咁的,貴至十幾萬嘅ROLEX DAYTONA,或平民至幾舊水嘅G-Shock,無論表帶鋼水幾靚、幾輕、幾有功能,甚至原廠表帶多款到戴唔晒都好,去到最尾,要與別不同兼凸顯品味,點都會追「本物」職人手造嘅custom-made皮表帶。其實都係拜藤原浩所賜,決心向不死本物流行致敬。於是,呢隻有可能係史上首隻Apple Watch自改皮帶,最終亦順利誕生。老土都真係要問句:表你有冇?咁表帶你有冇呀?

text-Nam photo-Man、Pakco、網上圖片

http://www.youtube.com/watch?v=8XSUfLrPsvc

藤原帶起改皮帶
潮界icon藤原浩,最識玩潮流同科技gadgets,特別係Apple,上年重獲邀去埋美國率先睇Apple Watch實物,更話可以試下扣喺背囊嚟襯(其實隻表好多功能都要掂住手腕先用到)。其實喺好多年前,藤原已經改玩ROLEX皮帶,亦同中村世紀、清永浩文聯手同Seiko合作推出高科技電子表WIRED h,當中就有玩過蛇皮款,外形贏晒之餘,亦勁hard-core。科技嘢可以玩本物,想快過藤原浩,即跟!

藤原san亦分享過試戴Edition嘅圖,就咁襯個皮圈已經夠型,留名等睇佢成隻全改。


內容延讀:

扮「復仇者」4大着上身系列

星.民全潮玩《Dubsmash》 對嘴自拍玩咗未?

賀鳥山明歸位!瘋粉都唔會知 《龍珠》9大秘聞!

皮帶型改 功能用番晒
唔同一般手表,Apple Watch有特別嘅換表帶設計,每條表帶都有小機關,原意係方便用家唔使任何工具都可輕鬆喺3秒內換帶,但對想訂製表帶嘅人嚟講,呢個反而成為挑戰,因為官方暫時未有adapter發售。思前想後,最好都係用番原廠表帶嘅機關再retouch。早年喺加連威老道玩L.L.Bean tote bag加工玩到出晒名嘅皮革職人Kit,已轉到同一條街嘅Miner49erhk一段時間,今次就應邀手造Apple Watch皮帶,完成後唔使擔心用唔到Apple Watch嘅健康監測同充電等功能,效果非常好。

$280加底最抵玩
剪爛成條表帶當然大犧牲,亦唔係個個捨得為咗更有個人品味,而肯將條新表帶咁快玩解構,所以等表帶老化後至搵職人幫手重生係最好選擇。若然乜都要諗,亦有個最快方案,就係叫Kit剩係加個底,唔使整爛表帶之餘,又可以食到本物風,效果一樣有型。價錢方面,全改由$750至$1,000、剩皮底$280至$400,視乎用咩皮同有冇額外要求而定。至於幾耐起貨,就要睇Kit嘅order多唔多,都係嗰句,有興趣趁早訂,早戴早享受。

正式開箱睇Apple Watch
為免有讀者從未認真睇過Apple Watch實物,點都要補番正常產品介紹,順便講埋總結。其實Apple Watch從來都唔止係智能手表咁簡單,要好科技咁講Apple Watch,難免會走入數據、規格同市場產品比較之死胡同,夠膽講句完全冇意思,皆因Apple Watch就係Apple Watch,能夠完美配合iPhone連動就係最大賣點,亦冇其他智能手表可以相提並論。至於之前擔心嘅電量亦屬杞人憂天,雖然要每日1充,但相信唔使靠尿袋或要充電線跟身,相反iPhone會因長期連動而用電多咗,亦唔算大問題。

運動、潮流達人點評

對Apple Watch第一印象係點?
感覺幾輕,外形好sporty。

咩功能最吸引你?
《Activity》(活動記錄)App有3個圓圈圖案去顯示「活動」、「運動」、「站立」3個項目。可計算每日消耗幾多卡路里、做幾多分鐘運動,最正係個Taptic Engine,當你坐得耐,隻表就會發出特別震動,感覺好似有人輕輕掂你手腕咁,提醒你郁下,幾得意。

最唔吸引喺邊度?
用Apple Watch講電話會聽得唔清楚,似乎唔實用,一定要用耳機。

最常戴喺手嘅裝置係乜?
Misfit Shine,因為外形夠潮,重有防水功能,戴住游水都冇問題。

有咩因素令你決定買/唔買Apple Watch?
比起其他智能手表,Apple Watch可換表帶,獨立性強,多元化啲。不過唔係幾滿意螢幕太細,而且單純做運動,未必需要有咁多功能。

對Apple Watch第一印象係點?
個款型過其他智能手表。

咩功能最吸引你?
Apple出嘅本身已經係吸引之處,我本身都係Apple fans。(笑)

最唔吸引喺邊度?
我覺得仍然太細,隻顏色亦好兒戲,夾埋膠表帶玩具感覺更重。可能呢隻係Sport版,如果有機會,想比較下鋼版同18K金版。

最常戴喺手嘅裝置係乜?
都係ROLEX,細細個就接觸,保值、多款玩都係魅力。幾年前都開始接觸舊版ROLEX,同新版相比更多咗份罕有程度。

有咩因素令你決定買/唔買Apple Watch?
呢刻我決定唔會買住,運動功能對我嚟講唔重要,最重要係款式、顏色,而暫時感覺唔算好吸引,可能呢隻係Sport版。亦未見到佢有好吸引嘅Apps,遲少少入手都未遲。

YOU MAY ALSO LIKE ...

There are 3 comments

Add yours
  1. 新Monday / Apple Watch配件在民間 速試! - 新Monday

    […] >全港率先教自改Apple Watch皮帶!潮跟! […]

  2. 新Monday / Apple Watch加adapter喪玩皮帶、軍帶 - 新Monday

    […] 早前同大家「些牙榮」咗少少Apple Watch民間配件,質素有高有低。不過今個禮拜就搵到好嘢,一於玩多次。之前我哋率先將Apple Watch嘅表帶解構再造,變成手造皮革本物風(回帶重溫),幫手搞呢個project嘅職人Kit話俾我知,份稿出街後已有人叫佢跟住照整,型人有taste係抵讚,不過唔使再跟車太貼,皆因我而家正式宣布「職人改革」,以後玩本物皮革表帶,唔需要再癲到剪帶重組,皆因近期俾Apple Watch用嘅adapter已經周街都買到。而家你只需要帶埋個adapter去搵職人Kit,就可以搞到條靚仔custom made皮帶,一齊再去尖咀探下佢玩多次啦! […]

  3. 新Monday / Hermès未出先玩!5條土炮Apple Watch皮帶手造靚過原裝

    […] 重記得4月我哋大膽搵咗皮革職人幫手,快過全世界咁改裝Apple Watch皮帶,今次我哋決定再度玩嘢,趁Apple Watch Hermès未出,一於整條土炮版賀一賀佢,兼講埋你知Apple Watch皮帶重可以點玩,Total 5條,各有特色。 […]


Comments are closed.