【外賣整蠱】電話外賣過千蚊食物慘被「走單」 車仔麵小店：請尊重餐飲業及珍惜食物

【外賣整蠱】電話外賣過千蚊食物慘被「走單」 車仔麵小店：請尊重餐飲業及珍惜食物

利嘉閣態度惡劣 利記職員兇喊女送餐

位於寶琳嘅榕記車仔麵指，本月12日下午2點有個劉生打電話叫咗大約十幾人份量的外賣，總共1,021元。榕記稱本身係用外賣平台接單，但考慮到對方留晒詳細地址且同電話，而對方公司亦較近，就在沒有收取訂金下趕起該單，然後派職員送餐。

職員送餐到利嘉閣後，利嘉閣卻派出一個態度極差嘅疑似經理級職員兇榕記車仔麵職員。

利嘉閣方面話，公司確實該名劉姓職員，但該職員今日無返工；講完就態度惡劣咁趕哂榕記職員出門口，搞到負責跟單嘅榕記女職員委屈到爆喊！

見此，榕記打返俾劉姓查詢，該劉生只係話俾人整蠱就若無其事，草草cut線了事。

榕記呼籲大家尊重食物

網民得悉事件後紛紛伸出援手，希望購買該訂單食物，減少榕記損失。唯榕記認為將其他人唔要嘅訂單，唔應該俾其他善良嘅人，所以一班夥計盡量食晒，爭取唔浪費食物。榕記被整蠱只能大嘆無奈，唯有硬食所有損失。同時也抱怨無得做晚市堂食再加2人限聚餐，本來就已經守到好辛苦。指責整蠱嘅人唔雪中送炭，更咁樣浪費同事時間同咁多食物！榕記做了鄭重聲明，希望市民尊重所有餐飲業的同事並珍惜食物。

網上亦有不少評論指利嘉閣處理失當，睇樓時會考慮其他中介公司。

附上榕記Facebook 貼文全文

就在剛才（2021年1月12日下午2點半），

我們所有寶琳同事都被耍到一肚氣！

我哋只係想求個公道，

同埋鄭重聲名一句：請尊重所有餐飲業的同事並珍惜食物！

話說2點有人打電話來問送唔送外賣，

我哋一向人手不足，

所以只靠外賣專線等外賣平台，

但今日有個自稱是劉生的人，

點了total $1021大概十幾人份量的外賣就叫我哋安排送到我們旁邊的利嘉閣。

我哋廚房同樓面同事見近近地，

加上對方又留哂公司電話同私人號碼，

於是同事們就極速趕起所有訂單，

然後三人行攞住所有外賣袋行過利嘉閣！

結果！

結果到了利嘉閣，

該店竟然派出一個態度極差嘅職員（經理？）要求我哋同事離開，

話呢度係有劉生，

但劉生今日無返工，

仲趕哂我哋同事出門，

搞到負責跟單嘅女同事委屈到喊！

然後我哋同事打返俾劉生，

劉生只係話俾人整蠱……

ok～

你（哋）俾人整蠱咩？

跟住就可以拍拍囉柚扮乜事都無，

但係我哋成班同事就真係俾人整蠱喎！

無得做晚市堂食再加2人限聚餐，

本來就已經守到好辛苦，

唔雪中送炭都算啦！

點解要咁樣浪費同事時間同心機，

仲要浪費咁多食物！

好多人問我地疫情期間外賣幫唔幫補到，

好簡單一個問題，

我哋寶琳店全場四五十個位，

一日要做幾多個外賣先可以補到！

如果只係貪好玩，

唔該睇下今時今日嘅香港、

望下所有外賣同食物、

再撫心自問一下良心過唔過意得去！