中國地鐵開聲睇片少女被開「罰單」？

Jun 24 2022

好多時候喺巴士、地鐵都會聽到有啲乘客會唔理其他人而將手機喇叭音量較大再聽歌或者睇片，呢啲行為對其他人會做成好大嘅滋擾，不過喺香港咁做並唔會觸犯法例，除咗提醒一下對方音量過大嘅問題就無其他辦法。但原來喺中國內地已經有相關法律去對付喺公共交通工具上製造噪音或影響他人嘅行為，近日仲成為咗熱門嘅討論話題。

中國網上流傳一段名為《女子乘地鐵手機聲音外放被開罰單》嘅影片。 — 網上流傳一段名為《女子乘地鐵手機聲音外放被開罰單》嘅影片。（圖片來源：微博＠都市報導）

女子喺地鐵因為大聲睇片被罰？

近日，網上流傳一段名為《女子乘地鐵手機聲音外放被開罰單》嘅影片。片中稱事發地點喺江蘇南京嘅地鐵入面，有一名女子因為使用手機時未有將音量調至靜音或者使用耳機，所以聲音十分滋擾，同時恰好被巡邏嘅地鐵工作人員見到，於是就開咗一張「罰單」比女子。後來由於網上回響太大，南京地鐵方面都澄清當時女子收到嘅只係南京地鐵為咗倡導文明乘車而製作嘅「告知單」，而唔係傳聞中嘅「罰單」。