日網選「10大睇極唔厭動畫」 《狐忍》《Pokemon》冇份?

熱話

廣告

日本動畫充滿熱血、友情、奮鬥、智慧,就好似近排再度火紅(戴頭盔:其實一直都hit!)嘅《One Piece》同《狐忍》咁,又開展又有新舞台劇,好嘅動畫,真係歷久不衰,好似《大時代》咁。日本有網站做了網上調查,訪問咗1班動漫迷,選出佢哋心目中「 10大睇極都唔厭嘅動畫 」(註:唔係漫畫),最令人意外嘅係,喺漫畫榜長期位列頭3位嘅《狐忍》同「國民動畫」《Pokemon》竟然冇份!《龍珠》亦係影都冇!大家覺得個賽果公唔公平?邊套又係你心目中「睇極都唔厭嘅動畫」呢?

text-專題組

10大睇極都唔厭嘅動畫

第10位:《雷朋三世》
呢套1972年推出嘅動畫,講述怪盜雷朋三世同拍檔點樣偷嘢,同時點樣逃避警察追捕,從外形設定到故仔,根本就係日本嘅占士邦。其中有投票嘅日本網友表示:「每次翻睇都會有新體會」,認真誇張。雖然《雷朋三世》喺香港播過,但其實喺香港唔算出名,而且畫功唔係人人接受,但就一定係上一代日本人嘅集體回憶囉……

 

第9位:《銀魂》
呢套跨時代嘅搞笑劍客動畫,最出名就係「抽水」,基本上每集都會搵其他動漫嘅人物同橋段惡搞一番,網友就話每次翻睇都會搵到新笑點喎!咦,咁咪同我哋星爺啲戲一樣咁勁?

第7位(並列):《千與千尋》
「宮崎駿」三個字向來已經係「歷久不衰」嘅保證,呢套2001年作品,主題係講環保,當然走得太前,有好多人都話睇唔明。有份投票嘅網友都話,第1次睇都覺得套戲橋段古怪,怪物造型核突。「但隨住年紀增長,每次翻睇都會因千尋嘅純真,而令自己受到心靈嘅洗滌,每次唔開心,睇完都會充滿正能量。」

第7位(並列):《幽遊白書》
原作者富樫義博最出名係搵唔同理由拖稿,所以佢嘅成名作《幽遊白書》,已算係佢屈指可數能夠完成整部嘅作品。當時由於以穿梭人界、仙界同靈界為主題嘅動畫唔多,而《幽》嘅打鬥場面非常引人入勝,所以當時大收旺場。不過就算有埋尾,個尾都係草草收場,每次翻睇都似悼念1套爛尾嘅好作品咁……

第6位:《幽靈公主》
又係宮崎駿作品,都係大師最愛嘅主題——諷刺人類破壞大自然嘅動畫,但內容有多場殺戮嘅情節,被喻為大師最血腥之作!
投票網友話翻睇係因為受主角珊珊公主嘅傻勁感動,但小編就唔敢翻睇喇,事關最後隻野豬變咗堆核突嘢,超嘔心……

第4位(並列):《One Piece》
漫畫長據暢銷榜no.1,動畫當然差唔遠,重係連載緊嘅長篇動畫。筆者就覺得動畫比漫畫更吸引,因為將漫畫一格格嘅戰鬥場面變成動畫真係刺激好多,而且動畫重會加入原創故事(可以當係外傳咁睇),又真係幾正!不過有受訪者表示,翻睇只因每星期等新1話等到頸都長先翻睇,咁……算唔算「呃like」呀?

https://www.youtube.com/watch?v=Vng33T6sKtA

 

第4位(並列):《蠟筆小新》
好「打耳」嘅小新終於出場喇!唔少人翻睇都話係紀念已故作者臼井儀人,亦有人話想再次睇下小新嘅傻氣,但更多人想翻睇就係為咗想打鑊佢……

 

第3位:《名偵探柯南》
個個翻睇嘅原因只得1個:兇案太多,唔記得件案點發生,同埋邊個係兇手,所以咪又要翻睇多次囉!

https://www.youtube.com/watch?v=h3x5E1JM4YI

第2位:《天空之城》
公認係宮崎駿大師藝術成就最高嘅1套作品,動畫畫功一流,根本就係以動畫去寫詩。近30年前嘅作品,就算而家睇番都會感動流淚,一啲都唔老土,要睇大師寫畫嘅真功力,一定係揀《天空之城》!

 

第1位:《龍貓》
個個媽媽都話「睇《龍貓》好過睇比卡超」,因為龍貓夠cute,而且古仔簡單易明,故事講述環保、人倫大愛但唔會說教,係雅俗共賞嘅最佳示範,即使幾十年後嘅而家睇番,絕對唔覺老土,係大人細路哥坐埋一齊睇都會睇得咁開心嘅電影。
同埋最重要:每個父母翻睇都係希望自己嘅仔女好似主角兩姊妹咁,咁錫自己!

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!

There is 1 comment

Add yours

Comments are closed.