【鍾培生林作百萬隻揪戰】林作嬲到撕爛合約：中文？零分重作！網友開賭盤：All in 鍾培生！

林作嬲到撕爛合約

兩個有錢仔經過多日口水戰，連網友都等到不耐煩。不過昨日終於有眉目，先是林作終於回覆鍾培生會應戰，今日鍾培生也立即向林作發出百萬隻揪的合約，更在社交網tag林作叫佢：「收嘢！」相當不客氣。

而林作也不示弱，已列印合約出來，又馬上拍片回覆鍾培生：「各位，呢一份係鍾培生先生send畀我嘅拳擊賽事舉辦合約，兩頁紙都唔知係咩律師寫。中文合約，我都未簽過，咁嘅垃圾都send畀我。咩鬼律師寫嘅爛鬼拳擊賽事舉辦的合約？０分重作。」最爆是林作即場撕爛合約，叫鍾培生親自來洽談，然後霸氣離開鏡頭，枱面只剩下一埋爛紙。

鍾培生又立即回覆林作：「除咗生死狀同埋出場費唔改得，有咩可以配合你。」同時，他又上載跳繩做運動的相，似乎已為今次一戰作出訓練。

傍晚時份，林作分享了賠率圖，搞笑留言：「買林作，係2021年發達最好機會，萬勿錯過。」看來對自己十分有信心。雖然林作不怕打，但網友就不多睇好他，表示：「你真係唔好輸，唔係肉酸死。」、「All in 鍾培生，贏梗。」和「不如賭你捱到幾多秒好過啦。」

花生咁大粒，全城市民都非常期待林作和鍾培生一戰，而林作女友裕美也想睇埋一份，她提到：「我好支持，因為我好想打佢好耐，當波打。有人幫我打非常好。佢唔夠人打唔緊要，佢預咗唔夠人打。以一個公道說話，我覺得鍾生會贏，但係我想睇到阿作畀人打。」

裕美又指林作個樣想撩打，並指會叫林作加重保險到1000萬，受益人寫自己個名。如果林作塊面傷咗，可以乘機整埋容，相當抵死。不過二人已連日口水戰，合約至今也未簽好，似乎距離真正打比賽也有一段日子，大家唯有繼續網上食住花生睇事情發展了。