wero opening

【想成為最強YouTuber必睇! 】1億點擊 Jason傳秘招

主打分享生活趣事同製作打機片YouTuber Jason,佢頻道總點擊率今個月內將達到1億次,成為首位點擊率過億香港YouTuber。咁鬼勁,我哋當然第1時間搵佢嘅分享成功心得﹕「我好少計劃,但片反而更真,呢樣係我啲片受歡迎嘅最大原因!」佢而家每日至少拍1條片,有人話佢濫,但無阻佢每條片至少有10萬人次睇過。原來拍得濫拍得真,就係Jason成功嘅最大原因!

text – Oscar photo – Jacy design – nam

Jason話佢絕對唔係靠演技取勝,因為自己表情唔多,呢個「失望樣」係佢片中出現次數最多表情。
Jason話佢絕對唔係靠演技取勝,因為自己表情唔多,呢個「失望樣」係佢片中出現次數最多表情。

密食當3番

係YouTubers都知,YouTube有個「伙伴計劃」,只要你條片達到某個點擊率,就會有糧出。Jason話呢個計劃係浮動價,個個月唔同,但平均每1,000點擊率就有十幾蚊。「13年年尾,我透過『伙伴計劃』每月都有約3、4千蚊收入,當時我諗,只要勤力拍片再加上freelance,主力做YouTuber都可以生存到。」

而家Jason維持每日出1條片,有時甚至出2、3條,佢YouTube頻道總共約有1,300條片,點擊率會今個月突破1億。係歌手同唱片公司以外,首個香港YouTuber能夠有1億點擊率。咁佢咪豬籠入水?Jason笑笑口話,實數唔會講,不過每個月收入「過入息中位數」(編按:即$14,000)。「我幾肯定我香港YouTubers中,係以呢個方式收入最多1個。不過講總收入我亦應該係最少,因為其他YouTubers會有其他工作如拍電影、拍廣告,我比較少呢jobs,或者同我拍片種有關。」

Jason話佢一有靈感就會即時拍片。「我每日拍1條片,有人話我『濫拍』,但我覺得分享自己生活瑣碎事都好開心呀。好似早排我女友一次過淘寶淘11箱貨返,我見到都呆!咪即時roll機拍片,逐箱拆開睇下佢買乜。試問有幾多人會一次過淘11箱貨?」

 

《日本直擊!拓也哥》係Jason最多人睇片,有成57萬人次,大家都好好奇到底「口技」強勁拓也哥遇到Jason,會有乜事發生?

 

「真」生活有共鳴

點解Jason片咁受歡迎?佢話一字記之曰:「真」。起初Jason只係拍生活片(飲食、玩具、無聊,總之乜都講下),因為太鍾意打機,就再加打機片。佢話生活片內容都真係佢現實生活中所見所聞,反而打機片有時會有少少造假。「有時專登打得差少少, 反而可以製造多笑料,等大家一齊笑下!不過我真係唔會度古仔。」

Jason話香港YouTuber同觀眾都鍾意慢工出細貨,會重古仔內容、故事創作同攝影技巧。不過對佢講,YouTube本身就係個『分享』平台。「無論你拍片技術好唔好,有冇故事內容都好,呢度本身就係『分享』地方,睇人真實生活片就好似自己都一齊經歷個過程咁,有人會留言:『我做咩要睇你生活?』咁我都想回答佢:『你咁唔想睇,又做咩click入睇?』」

 

Jason話自己講串串,但其實佢同其他YouTubers好老友。
Jason話自己講串串,但其實佢同其他YouTubers好老友。

 

內容延讀:

神童2分鐘教你做YouTuber

《新Monday》教你整 Dim Cook Guide易整七彩米通

廣告

YOU MAY ALSO LIKE ...