真身呀! 紅爆網絡插畫師Hello Wong起底式曝光

流行娛樂

廣告

今期主角Hello Wong可以話係近期social media最紅插畫家之一,佢嘅多格插畫最大特色,係畫中人物全部面上都有兩粒紅卜卜胭脂,畫嘅係時事諷刺又或懷舊趣事,篇篇啜核到肉。

佢嘅fb page上年2月開設,而家有超過55,000人like。佢最初開page係因為辭工後,做全職freelancer為吸客而開。但漸漸發現自己作品可以令人開心,感覺比賺大錢重爽!所以雖然收入大減,佢仍堅持落去。佢嘅打工態度就係:至緊要happy。

text – Jessie photo – Mike W.、由被訪者提供

冇錢嘅工先開心

筆者睇Hello Wong嘅作品,諷刺時事一針見血,又成日講啲7、80年代懷舊嘢,估唔到從來冇喺網絡世界「蒲過頭」嘅佢,係20頭後生仔1名,更估唔到「Hello Wong」唔係筆名,原來係佢讀小學時自己改嘅英文名,重一直用到而家,你就知佢份人幾咁跳脫。
呢位仁兄讀完graphic design,做咗4年廣告設計,上年辭職。「份工成日要OT,啲客揀嘅設計又未必係我鍾意嘅,一啲都唔好玩。不過最重要係未辭職前,我望住隔籬30幾歲嗰位同事,就諗自己第時都要同佢一樣,為返工而返工,日日OT?我相信冇糧出佢唔會返工囉。我又諗如果世上有份工冇糧出但你都重繼續做,先係自己做得開心嘅嘢,咁我咪辭工,諗番起自己都幾任性。」

玩懷舊爆post

做全職freelancer,Hello就喺facebook開咗個page,原意係擺自己作品俾啲客睇。「但只擺自己design作品,俾你都唔睇啦?於是開始畫生活嘢。」
Hello指而家比起打工時,收入少好多,但就開心好多。「錢唔係一切,其實初初轉做freelancer幾乎係零job,好彩同以前老細熟,佢會彈啲jobs俾我,當時收入僅僅夠俾家用咋。好彩個page都有人like,就開始有人搵我做嘢同喺我個page落廣告。而家1個月有2、3單jobs,最正係冇限時限刻做,自由好多。」

Hello個page開始時增長都幾緩慢,直至到上年8月畫咗幾篇「動漫人物長大後係咩樣」系列,旋即引起網友熱烈討論,佢page like即時由3、4千升到萬幾。「冇諗過會引起咁大回響,記得當時食食下飯,電話因為校咗facebook notice狂響,不斷有人留言、分享,每refresh 1次,like數都會跳,感覺好爽!」
之所以有呢個idea,Hello話有日佢執舊相見到自己細個啲相,記起細個好鍾意《叮噹》(多啦A夢),就突然覺得自己會長大,卡通人物長大又會係點樣?「於是根據我對各卡通人物嘅理解,再融合現代社會文化創作成人版嘅卡通人物:例如靜宜變成好鍾意selfie、會擺出各種古靈精怪pose嘅女仔。作品反應幾兩極,有網友覺得好鍾意,但亦有人心目中覺得卡通人物永遠純潔,唔可以褻瀆,就俾佢哋鬧一餐,我冇嬲,不過覺得好奇怪。」

唔敢做就畫俾自己

除咗懷舊,Hello亦會將佢平時唔會或唔敢做嘅嘢融入畫入面。好似佢作品嘅主角——爆炸頭男同埋肥兔,爆炸頭男嘅設定係因為「現實中打死我都唔會電爆炸頭,我想像唔到自己會係咩樣。」而肥兔就因為佢一直都好鍾意寵物,不過唔敢養,因為驚會養死佢哋。「曾經經過寵物店,見過隻肥兔印象好深刻,好想養,所以就畫咗隻俾自己。至於點解所有我筆下嘅角色都有圓形紅色胭脂,純粹個人喜好,哈哈。我想畫啲標誌性嘅嘢代表自己,加上由細到大我都有畫開咁樣特徵嘅公仔,而家啲朋友都話一睇到啲畫,見佢哋臉上兩個紅點,就知係我畫嘅。」

最愛周星馳

Hello作品好多係關於舊事、人、物,好似以前嘅卡通、零食,佢話一向鍾意舊事物,最常做嘅係翻煲8、90年代電影。「周星馳一定會睇,洪金寶、曾志偉等人演嘅《福星》系列喜劇亦好鍾意。我覺得劇情片睇1、2次就夠,但笑片睇幾多次都唔會厭,有時做嘢,電腦螢幕會分開兩格,一半畫圖,一半播舊電影,就算唔睇畫面,齋聽聲都重笑得出。」
會唔會好想返去舊時嘅香港?「當然想啦!我會用而家20幾歲思想嘅我,返去30幾年前80年代嘅香港,我覺得當時成個環境、社會氣氛都開心好多,啲人都唔會只係為錢而工作同生活,唔會有咁多抱怨。」

出書熱血最強

而家Hello算係夢想成真,做自己想做嘅嘢,又唔太受到拘束,嚟緊有咩大計?「而家做網絡插畫師競爭大咗好多,比較亦多咗,不過我相信有麝自然香,鍾意睇嘅自然會留意,但開得page就始終都想有人睇,唔係純粹自high,要有讀者先至會有畫嘅動力,呢樣係我要keep落去嘅。唯一肯定係暫時未有出周邊商品嘅計劃住,因為唔想為錢而做,但我一直都好想出書,今年內亦都將會成真有機會出書。書中會精選啲網上作品收錄入去之外,當然會有新嘅作品。成本書嘅方向係青春、熱血、感人同搞屎棍。」

Hello話一直都想嘗試整動畫,以下呢條係佢今年農曆年時整嘅片。「不過暫時未有打算去進修,因為我係一係唔做,一做就要做到得心應手,唔能夠短期內做到。」