酒水 靚女 欖球隊 熱爆Rugby 7
##embed-label-13##
「國泰航空/滙豐香港國際七人欖球賽2015」（以下簡稱R7）上星期日圓滿結束，3日裏面16支隊伍共打咗71場賽事。屈指一數，R7今年已踏入第40屆，多年嚟捧場人數有增無減（今屆3日入場人次達12,000人）。其實欖球喺香港唔算普及，咁多人入場，全因無敵氣氛：強勁音樂、萬人大合唱，再加上酒精同高質素靚女觀眾，真係正過唔少rave party。Miss咗今年又或者等唔切下屆嘅朋友，就等我哋帶大家入場感受下現場氣氛有幾震撼。
text-專題組 photo-Tung、Pakco、部份相片由Power Sport Image及香港欖球總會提供
識坐必坐南看台
講到睇R7，無論你係資深欖球迷，定係乜都唔識嘅初哥，都一定會被場中熱爆嘅氣氛吸引！當中南看台更係球迷每年「兵家必爭」之地，全因呢度集中最瘋狂嘅男球迷同最索嘅女球迷！不過你要有心理準備，因為未行到入去，已經聞到濃濃嘅酒味，飲大咗嘅球迷會狂潑啤酒，個場好似落啤酒雨咁，好難避免唔濕身，其間亦會有球迷失驚無神走埋嚟攬住你，所以自問玩得嘅先好入去。不過好玩嘅地方特別多靚女，唔信？有圖有真相呀！
斐濟15連霸
R7每個站分為銀盃、銀碟、銀碗及銀盾賽，以16隊參賽隊伍為例，種籽隊排名最佳嘅8隊會競逐銀盃賽，而喺銀盃賽落敗嘅會爭奪銀碟賽。至於分組賽隊伍勝方會角逐銀碗賽，負方則爭奪銀盾賽，總括而言，都係以最佳成績隊伍先可以爭奪銀盃，如此類推咁角逐銀碟、銀碗及銀盾。好似超級強隊斐濟，分組賽3戰全勝，總決賽擊敗新西蘭，取得銀盃賽冠軍，佢哋已經係第15次贏得呢個獎項，亦係贏得呢個獎最多嘅隊伍。銀碟賽冠軍則由澳洲奪得，銀碗賽冠軍係蘇格蘭，銀盾賽冠軍係肯亞。
Cosplay搶鏡
除咗靚女，南看台重有唔少cosplayers，個個都鬥奇鬥搶鏡出位。
