【藍橘子】《女朋友最鍾意嘅影相姿勢,名命為『喂嗌妳啊』》

熱話

廣告

【藍橘子】《女朋友最鍾意嘅影相姿勢,名命為『喂嗌妳啊』》

有樣嘢我真係唔係好明,女朋友鍾意影相我明吖,係女仔都鍾意影相。

Text:藍橘子 Photo:電影截圖、電影宣傳照﹑連詩雅Instagram﹑LEEMINHO Facebook

但睇返幫佢影嘅相,發現無論去邊個景點,發現佢來來去去都得幾個姿勢…

首先講講站姿,究竟交叉腳企係咩玩法?女朋友話咁樣會令佢對腳望落長啲。但根據女朋友所講,呢招「交叉腳」,一定要配搭由地面炒返上去咁去影,條腿望落先可以達成最長嘅效果。 

 
除咗長腿,影相最重要令塊臉瘦啲,所以女朋友影相,隻手硬係遮住塊面,一係撓頭髮,一係托腮,遮嘴、遮眼…

不過,要數到佢最鍾意嘅姿勢,就係『喂!嗌妳啊!』。
咩意思?就係當女朋友背向鏡頭行緊,突然有人喺背後嗌佢,佢回頭擺出一副愕然樣,就叫『喂!嗌妳啊!』姿勢。

「點解妳咁鍾意影呢個pose?」我忍唔住問。
「呢個樣最自然啊嘛!」
「我有影妳真正自然嘅相㗎。」
「仲好講,你成日影我醜態就真,一係隻眼半開合,一係個嘴半開閤,一係隻手唔知做緊乜咁。」 
「咁妳要自然嘛!自然係咁㗎啦!」
「自然美態啊~好似啲雜誌MODEL咁啊!」
「MODEL係扮自然啫,佢平時咪又係半開閤!」
「但影回望相就係想要呢種效果啊。」

臨尾,女朋友仲要補多句:「之前,我夠幫你影懸浮相啦!」

一講起懸浮相我就嬲!女朋友總係抓唔住個時機,一係就太早,搞到我姿勢好似屙緊屎咁。一係就太遲,降落緊啲頭髮飛起晒,雙眼反白,係人都知我跳緊。
所以,我而家已經唔敢對女朋友嘅影相技術有咩要求,有人有景,清楚唔濛就收貨。

 
講返「回望相」,其實技術含量好高。女朋友一回望嗰剎那,就要捕捉佢最自然嘅笑容,Hold多幾秒佢個表情就開始僵硬,所以一定要夠手快。

夠手快之餘,仲要配合埋背景,長長嘅街道,途人有少少動感但唔好太搶鏡咁就PREFECT池!

不過,凡事都有失手嘅,有次我幫女朋友影完張『喂嗌妳啊!』之後,一睇部相機,仆街,對錯焦落後面背景個女人度添…

「靚到絕啊!不過可以影多幅再靚啲~」
趁女朋友再背向我,我即時del咗張圖!
「一二三~完美啊~」

喺其他人面前,我唔會扮攝影大師。
女朋友喺我面前,先會願意擺咁多Pose。
所以幫女朋友影相,其實都係一種情趣黎。
(不過我可以肯定咁講,女朋友嘅攝影技術…係災難)
內容延讀:
【藍橘子】《仲要令幾多山頭淪陷,香港人先承認自己無公德心?》
>>> LIKE我們fb <<<
fb.com/newmonday.com.hk

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!