【藍橘子】《每個男人whatsapp都有一個男人群組》

熱話

廣告

【藍橘子】《每個男人whatsapp都有一個男人群組》

我喺Whatsapp有一個兄弟Group,呢個Group喺女朋友眼中,只係一班豬朋狗友…

約打機、約飲酒、上網Cap素女圖分享評論「如果係女朋友每日點過?」但呢個Group喺我同埋班兄弟嘅眼中,係一個好珍貴嘅『心事台』。
平時無乜事發生,的確如女朋友所言,我哋成班男人嘅談話內容真係有啲衰格…
阿強:「注意注意:銅鑼灣好多長腿!」
阿明:「無相有乜好討論?」
阿堅:「天氣咁凍,啲搬貨工人仲赤膊上陣,會否扯lin旗?」
我:「唉,工作上有啲煩,想問意見…」

本來無聊嘅討論話題立即暫停,大家開始問我發生咩事,正正係呢個Group嘅可貴之處。我同佢哋講,個event所有嘢都會由上司簽名,但而家出事就乜都賴晒落我身上…

「上司男定女?佢擺明想溝你!」
「有死貓梗係你食,乜有上司會認錯㗎咩?」
「有需要嘅出嚟飲杯酒再傾。」

有時候,煩惱未必會解決到,但有一班人畀我申訴吓,已經好開心。當然有唔開心,我都會同屋企人商量,亦會同女朋友訴苦。
但唔知點解,喺兄弟Group訴苦,真係最治癒!有時會被大家恥笑,有時會有認真嘅意見,每次講完出嚟心情都輕鬆不少。
而兄弟Group另一個特點就係,佢哋會毫不留情地…毫無憐憫地…去寸你同嘲笑你!

好似阿強咁,佢每次同女朋友鬧交都會喺Group呻,又話同女朋友唔夾,思考模式完全唔一樣,唔知點同佢行埋下半世。

阿強女朋友我哋都認識,所有兄弟都想佢好,認真開解佢,希望佢唔好分手。
點知,隔咗唔夠一個星期,阿強Facebook就貼咗張同女朋友恩愛合照,慶祝相識周年紀念,好慶幸可以認識佢咁話… 
當然啦,呢個post一出,成班兄弟即刻Cap圖鞭屍。不過,下次阿強再同女朋友鬧交,我哋一樣會開解佢,阿強亦唔會收收埋埋,有乜都同我哋分享。
除咗煩惱,要搵到一班可以分享成功嘅朋友更難。
當你有幸升職加薪,除咗同女朋友講之外,喺呢個憎人富貴厭人貧嘅社會,你仲可以同邊個炫耀?!
如果你喺facebook出個post,相信好快就會變成公司同事嘅眼中釘,因為當你被成功喜悅沖昏頭腦,好容易講錯嘢得罪人。

但如果有兄弟Group隔一隔就唔同喇,兄弟唔會妒忌你成功,更加會替你開心,因為佢哋最明白你消耗幾多心血,花幾多努力先得到今日成就。
如果大家都有一個類似嘅Group,希望大家可以好好珍惜。因為無論你喺出面識幾多人,呢個Group都係無可取替。
 

內容延讀:

【藍橘子】《點解旺角班大叔唱得咁難聽都有人圍觀》

>>> LIKE我們fb <<<
fb.com/newmonday.com.hk

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!