好食車仔麵 必食全港10間本土味車仔麵

生活

廣告

車仔麵是經典港式平民美食。藏身街頭巷尾,靈活多變,一撮油麵、十幾廿款餸任意挑選、再加兩殼熱湯、淋匙辣汁,就是一碗庶民Comfort food。功夫多,利潤低,要做得好食並不容易。究竟邊到有 好食車仔麵 ?今次就挑選以下10間各有名氣、歷史的必食車仔麵店,向這道本土美食致敬!

text-Ruby photo-Hong、Mark、KwanYiu、Meck、新傳媒資料室

好食車仔麵即睇10間

1. 車仔麵之家 上癮生炒咖喱魷

六十多年前街邊檔起家,除了捧著麵立食吃的特色,咖喱魷魚最馳名。每朝在廚房把阿根廷乾魷、自家製咖喱醬生炒爆香,濃濃咖喱香味湧出店外,魷魚炒得夠辣又入味。

十九款餸料全部都是傳統經典選擇,酸齋外脆內軟;牛腩口感軟滑,五香味濃。湯底每日以雞骨、豬骨熬煮,又定時加新骨來熬,愈熬愈濃。麵條食落軟硬度剛好,加一兩匙招牌咖喱辣醬,錦上添花。

餸料每款$6-$10,粉麵$8-$16

魷魚口感彈牙,有鮮味,咖喱微辣,餘韻有香料清香。

招牌咖喱魷魚每日炒兩次,通常3pm前沽清


午飯時間,人龍排到入後巷,更有人企後巷食麵。
車仔麵之家
地址:灣仔晏頓街1號A舖(顯示地圖)
電話:2529 6313
營業時間:7:00am-6:00pm(星期日休息)

2. 肥哥車仔麵 刺激爆炒辣汁

店子鄰近文青熱點JCCAC,老闆肥哥賣麵三十多年,由推車仔做到入舖。湯底以豬骨熬湯,還加入大量冬菇椗,使湯味更見鮮甜。辣汁更有四種辣度,以大量新鮮指天椒、乾椒、指天椒粉煮成,更會手切新鮮青紅小辣椒加料,平日吃慣譚仔中辣的小編,試一匙小辣,已經標汗!車仔餸有坊間少見鮮牛肉,口感嫩滑;更有原個雪耳,索晒湯汁好特別,亦堅持要做到嗱喳麵不嗱喳,豬皮用火輕燒,再人手箝出細毛,好講究。

餸料每款$7-$12,粉麵$7-$10

腐乳通菜 $15 腐乳自家以辣油、蒜粒、辣椒粒腐乳調配,特別惹味。

Graffiti招牌,讓人老遠都見到,很搶眼。

一近黃昏開始多人,好多熟客到來聚腳,人多時會在店外放四、五張摺枱。

肥哥車仔麵
地址:石硤尾白田偉智街38號福田大廈地下55號(顯示地圖)
電話:2529 6313
營業時間:7:00am-6:00pm(星期日休息)

3. 華記小食店 王子創意車仔餸

隱藏在青衣涌美老屋村,店主自稱「車仔麵王子」。其實上世紀60年代,王子的爸爸已在青衣大街賣麵,後來父親病逝,王子二話不說回家接手,傳統餸料跟足舊時做法,同時藉著外遊的見識,將新元素滲入車仔餸中。

三十多款餸,有傳統豬紅、蘿蔔、豬皮;創意也有炸雲吞,鯪魚肉加入粟米、麥皮,口感豐富;煙燻雞翼以綠茶燻香,用黑糖調味,煙燻味清香,肉質嫩滑。還有昆布汁鮮吊桶、自家磨豆花等隱藏菜式,不過只供應給熟客,能否吃到就要講緣份。

餸料每款$3-$15,粉麵$6-$9

雞肉充滿茶香和燻香,再加黑糖汁,帶微甜。

炸雲吞口感爽彈,味道有魚香之餘,還有粟米香甜

寸勁豬頸肉 $48-68(視乎大小) 堅持不用鬆肉粉,用拳頭打鬆肉質。灑上原粒孜然,用火槍燒香,香味滿溢。

坐在戶外食車仔麵,份外有風味。
華記小食店
地址:青衣涌美老屋村90號地下(顯示地圖)
電話:2436 0710
營業時間:7:00AM-3:00pm(星期二至日)

 

4.永年士多 回甘藥材湯

元朗地標,五十多年歷史,由士多雜貨到賣腸粉魚蛋車仔麵。食物由屯門中央工場製作,成品運來店中再翻熱、調味。

湯底用了廿斤豬骨、老雞熬製,還有果皮、當歸、甘草等材料,令湯底多了一股藥材的甘甜,頗獨特。傳統餸料水準中上,大腸半肥瘦,豬皮乾淨無沙,豬紅軟熟入味帶蒜香;更有流心蛋,蛋汁濃稠有蛋香,值得一讚。

餸料每款$8,粉麵$8

紅豆奶茶、柚子檸水 $22 紅豆香甜,配厚滑奶茶,是紅豆冰變奏。微酸柚子蜜加上檸汁,味道清新。

新裝修後換上長木枱,鐵凳的工業風,感覺時尚。

安排至少八個員工負責車仔餸櫃,好有效率。

一到假日,人龍長到圍住整間店,起碼排廿分鐘。
永年士多
地址:元朗教育路88號寶城洋樓2-4號(顯示地圖)
電話:2477 3816
營業時間:12:00nn-10:00pm

5.麵麵店 50款車仔餸列陣

給人最深印象是老闆小儀,但其實麵店早在98年於佐敦開業,後因業主加租,後來得小儀出手入股,得以繼續經營。

單說麵類就有十款,連讚岐烏冬、檬粉、粉絲都有。餸料近五十款,新派選擇有麻辣蓮藕、沙葛餃、魚肉春卷等。特調麻辣汁掛在爽口蓮藕片,香麻中隱約有蓮藕的清新。豬骨清湯底可加辣汁、咖喱汁,還有獨家薑酒湯,加玫瑰露煮,薑味清香。

餸料每款$8-$12,粉麵$14-$17

麻辣蓮藕是餐廳招牌菜,麻辣汁小麻多辣。

原木長枱、木板凳,裝修別於傳統車仔麵店。

黑色大門,大玻璃窗,很有新派麵店的感覺。
麵麵店
地址:佐敦廟街274號(顯示地圖)
電話:2375 3300
營業時間:10:00am-10:00pm

6.新記車仔麵 靈魂辣汁吸擁躉

其實擁躉一向多,其靈魂之辣汁是招牌,據說是老闆每晚凌晨兩點,邊炒邊撈的成果。辣汁質地濃稠,帶點微微嗆喉,啱辣迷。

豬骨湯底熬至少兩小時,出奇地有回甘。車仔餸平均水準中上,滷水雞翼尖、豬腸入味軟腍,炸魚皮入口脆卜卜。定價相比其他店高,坊間每款餸最低$7,這裡就$10,份量卻比正常少四分一。

餸料每款$10,粉麵$10

雞翼尖色澤褐紅,賣相得!

擁躉眾多,由朝到晚迫滿人。
新記車仔麵
地址:銅鑼灣登龍街49號地下B舖(顯示地圖)
電話:2573 5438
營業時間:12:00nn-11:30pm

7.榮安小食 米芝蓮街頭美食推介

2015入選米芝蓮十大香港街頭美食。店內員工至少半百,發黃的牆身、銀色筷子筒,有人覺得懷舊、有人覺得邋遢。30多年前由舊式士多起家,自家製滷水雞翼最熱賣,後轉型車仔麵,成荃灣地膽至愛。滷水汁香味出眾,餸料如大腸、雞翼尖、豆腐都香得有層次。不過環境較細,來吃要排隊,落單、取麵、飲品都要自己拎。

餸料每款$5-$8,粉麵$5
榮安小食
地址:荃灣大河道24號B地下(顯示地圖)
電話:2492 6300
營業時間:11:00am-12:00mn

8.榮記粉麵 遊客人龍店

銅鑼灣無人不識的名店,門前人龍不絕,連遊客都識搵上門。蘿蔔、豬紅、魚蛋水準正常,主打雞翼尖算滑;辣油鮮紅、微香,湯底帶甜,至讚是大部分時間會免費送幾棵時菜配麵。不過車仔麵最多只可點五餸,樓面阿姨解釋,是因麵碗太細……不太Flexible。

單拼/雙拼 $33,三拼$39,四拼$45,五拼$51

榮記粉麵
地址:銅鑼灣糖街27號A地下(顯示地圖)
電話:2808 2877
營業時間:11:30am-10:00pm

9.文記車仔麵 每日不同餸料

相比其餘9間店,文記年資算短,開業五年。身處麵食名店雲集的深水埗,卻經常滿座。車仔餸選擇超多,每日近五十款,必點香脆豬油渣,一咬甘香豬油滲出;更有上湯柚皮、辣味螺肉、陳皮魚蛋等經典餸。不過水準飄忽,同一個阿姐剪餸,柚皮時厚時薄,影響口感,豬腸亦切得時大時細,較為隨意。

餸料每款$8-$12,粉麵$7-$8

文記車仔麵
地址:深水埗福榮街121號地下(顯示地圖)
電話:9059 5104
營業時間:24小時

10.九記牛什粉麵 牛雜選擇最多

開在鵝頸橋街巿熟食中心,白領至愛,午巿必現人龍。牛雜款式選擇最多,牛腸、牛膀、草肚、金錢肚、牛沙瓜,說得出都有。老闆九仔每朝六、七點入手新鮮牛雜,花大量功夫處理,招牌牛腸,重複清洗裡裡外外,揤走肥膏。同場也有手打鯪魚餅,彈牙,魚味鮮濃。

餸料每款$7,粉麵$6

九記牛什粉麵
地址:灣仔鵝頸橋街市熟食中心8號檔(顯示地圖)
電話:2988 8960
營業時間:7:00am-5:00pm

11.太安樓林記 自家咖喱汁

太安樓內的熱門車仔麵店,最正是門口設開放式車仔檔,連Viu TV電視劇《瑪嘉烈與大衛》都去取景。四十年歷史,家庭式作業,媽媽執餸、阿仔輔助,一碗四餸麵大約三十五蚊,份量好足。餸料中規中矩,自家調製咖喱汁、辣汁味道層次反而豐富惹味。堂食都以發泡膠碗上,不夠環保。

兩餸$24,三餸$30,四餸$36 (另加每餸$6-$10)
太安樓林記
地址:西灣河筲箕灣道57-87號太安樓地下A34A舖(顯示地圖)
電話:從缺
營業時間:12:00nn-3:00am

12.車品品 個性老闆台式風味

性格小店,只做晚市,星期一及紅日又休息,開門不準時,通通講老闆心情,小編去食都試過摸門釘。不過粉絲眾多,不時有食客排隊等開門,上菜速度極慢,柯打後等半小時才有得吃。餸菜限量製作,走台風,魯肉餃、滷水蛋(鐵蛋),連滷豬腸都是帶甜的台式風味。

另魯肉餃4隻$29,餸料每款$9-17,粉麵$12-25

車品品
地址:大角咀埃華街92號(顯示地圖)
電話:2180 9655
營業時間:6:30pm-11:30pm、(星期二至五 )6:30pm-11:30pm 及7:00pm-11:30pm (星期六及日)

(星期一及公眾假期休息)

 

內容延讀:

STARBUCKS咖啡杯 必搶7大PAUL & JOE櫻花白貓系列

>>> LIKE我們fb <<<
www.facebook.com/newmonday.com.hk

香港有甚麼地方適合與閨密、情侶,一大班朋友去?

與閨密、情侶約會的話,當然要選擇氣氛好的地方啦!全港12間必去天台酒吧 都超有feel,傾得興起難免會飲多幾杯,如果出現這些醉酒特徵 時就要適可而止了!返工返到攰,不如一齊去按摩店鬆一鬆,油尖旺按摩店 非常多,實有一間啱你。一大班朋想熱熱鬧鬧,燒嘢食最好不過了,即刻熟讀BBQ技巧7式 ,包你喺燒烤場上戰無不勝!

家居清潔有甚麼好方法?

家居清潔非常重要,做不好隨時影響健康!很多人因為床褥體積大不容易洗滌,而忽略了床褥清潔,即睇5招床褥清潔方法;冷氣機內外都容易累積大量灰塵,洗冷氣機方法好簡單,輕鬆洗走灰塵黴菌。當然做足家居清潔都不能避免曱甴入屋,10種有效消滅曱甴攻略幫到你!