打造全港首個棉花糖聖誕｜2017 甜蜜歡度佳節

仲有一個星期，聖誕節就到喇喎～今年諗到去邊打卡未？想同身邊嗰位sweet sweet，一齊過一個難忘嘅新體驗？咁就要嚟天水圍T Town打造嘅棉花糖世界，過一個甜蜜聖誕啦！有齊6個棉花糖裝置打卡位、玩聖誕遊戲贏禮物、仲有機會贏埋台灣直送嘅特別口味棉花糖同換埋T Town限定棉花糖花束！呢個棉花糖聖誕，仲唔贏盡身邊大小情人嘅歡心～

棉花糖聖誕 6大甜到爆打卡位 甜蜜「綿綿」聖誕村

入到呢個以棉花糖主題布置嘅商場已經夠晒甜蜜，每個角落都係打卡位，包括「甜蜜龍捲風」、「棉花糖雪人暖暖杯」同「幻彩棉花糖森林」等等，聽到個名都已經感受到嗰份甜蜜，全部都好色彩繽紛，情人們一定滿意！

挑戰聖誕屋贏禮物

天水圍棉花糖世界場內有3間聖誕主題遊戲屋，雪人甜甜圈（拋圈套物）、百發百中薑餅陣（射擊遊戲）同翻滾白雪球（保齡雪球），即玩即有禮物拎走，玩得刺激又開心！

（註：只要於場內消費滿HK$50，即可換領「聖誕遊戲券」1張，儲夠2張便可玩一次遊戲，成功過關即送神秘禮物一份。）

聯乘台灣棉花糖達人　鹹味棉芝糖食過未？

打完卡又玩下遊戲，就可以好輕易贏到來自台灣、被稱為世界第一棉花糖專門店「綿菓子」嘅特別口味棉花糖！「綿菓子」嘅棉花糖用獨門製作技術，令棉花糖食落軟綿綿但又帶點咬口，重點係味道獨特，T Town今次帶嚟卡滋梅子、日式海苔、OREO曲奇、香甜蘋果、紅茶牛奶同夏日檸檬口味，當中日式海苔甜中帶鹹，鹹味又滲出甜味，總之真係估佢唔到，必試！ 贏齊晒3間遊戲屋內遊戲，仲有機會換埋首次登陸香港嘅棉花糖花束。除此之外，每星期有款獨特口味嘅棉花糖球會空運到港，轉眼就換晒啦，仲唔早啲入嚟玩！

活動內容：

T Town甜蜜「綿綿」聖誕

日期：即日至2018年1月1日

地址：新界天水圍天華路30至33號（輕鐵頌富站旁）

活動內容：6大棉花糖主題布置、3大聖誕主題遊戲屋、全港首創棉花糖花束作禮物

甜蜜「綿綿」派對

日期：2017年12月24及25日

時間：中午12時至下午1時；下午4時至下午5時

地點：T Town北1樓

活動內容：「花式棉花糖表演」、「聖誕綿綿報佳音」及現場派發一口棉花糖。

聖誕許願雲

日期：2017年12月17、26及31日

時間：中午12時至下午4時

地點：T Town北1樓

活動內容：現場免費派發迷你棉花雲朵。