166WEB

三聯幫牟中三專欄(一)! 《原來波鞋街術語竟然同天地會有關?》

【三哥】原來波鞋街術語竟然同天地會有關?

相信就算未做過鞋鋪未賣過鞋,身為香港人多少都聽講過鞋鋪專用暗語,基本上如果冇做過相關行業,都好難能夠學得哂,最為人熟悉嘅暗號都唔少得代表數目一至十嘅「丁元王叉仔共廿分尤平」,咁究竟呢類暗語係由邊個發明?

暗語通常指一啲故意令一般人難以明白嘅小圈子用語,就好似你背後幫老細或者同事改嘅花名一樣,講起暗語大行家,不得不提清朝出現嘅「天地會」。天地會係乜就唔駛多解釋啦,為咗逃避清朝官府追捕,佢哋由組織名、各區辦事處地址去到平時行動都需要用暗號溝通。多年之後,天地會輾轉幻化成好多唔同組織,其中包括意指香港黑社會嘅「三合會」等等。

由天地會開始,暗號編成方式離唔開幾種宗旨,最常用包括將原本嘅字體增加或者減少筆劃,同埋將字拆開變成一堆數字,例如將「洪」字拆成代表組織頭目或者其他職位嘅數字組合。

天地會其中有一脈分支名叫「江相派」,主要係由假相士、道士、和尚、尼姑、廟祝等等組成嘅老千集團,民國初年主要係廣東同香港活動,全部文人組成,當中唔少成員積極參與清末嘅反清革命。

江相派有好多暗語都變成香港人而家講嘅口語,連「昆人」嘅「昆」字都係由此而來,其他例如「七」代表丈夫、「八」代表妻子,即「七佬八婆」;「馬」代表手下,「出馬」即開始行動,「搬馬」即集合手下,等等等等。無獨有偶,江相派對數字都有自己一套叫法,其中三為「王」、四稱「則」、五稱「中」。

再睇睇今日賣鞋術語,點解一係「丁」、二係「元」、三係「王」?不外乎都係繼承天地會傳統,將原本數字加筆劃,稍為加一兩筆,一二三就變成丁元王,四叫「叉」其實指係對應花碼之中化表四嘅「〤」,「仔」同「共」筆劃數目就係五同六,七八九十同一二三原理一樣,都係加筆劃而變成「廿分尤平」。

所以,下一次當你去波鞋街買鞋又好、賣鞋又好,除咗留心個碼數有冇搞錯,店員會唔會「昆」人嘅時候,都可以想像下,大概一百幾十年前,同一番暗語原來竟然有完全唔同嘅意義。

內容延讀:

高登小說《西營盤》電影化確定 5大高登小説電影回顧

>>> LIKE我們fb <<<
www.facebook.com/newmonday.com.hk

YOU MAY ALSO LIKE ...