韓謎日誌-韓國呢期興「華Dee」look?

Blogger

廣告

【韓謎日誌by Pink】喺度同大家講句唔好意思先,咁多期冇交稿俾大家,因為我返咗韓國做嘢,每日都準備見客、開會啲嘢,所以先遲咗咁耐咋~大家放心,今趟我有好多關於韓國嘅筍嘢陸續喺度曬冷俾大家,包唔會令你哋失望嘅。

 

其實每次返親韓國,除咗做嘢之外,咁梗係瘋狂購物一番啦!好多人實會問我,邊度買嘢最平、靚、正?老實講,我好少買名牌,但我對衫褲鞋襪係非常講究,因為着得上身,料靚之餘,一定要個cut靚,如果唔係我會周身唔聚財,成日都好失落做唔到嘢。

我想講嘅係,喺韓國買衫唔一定平,因為通常我啲韓國女仔朋友同大部分香港女仔一樣,都鍾意網購,貪其款式多又平。而由於我瀬過無數次嘢關係,我已經好少online shopping喇!而且我好享受行街shopping嘅過程,呢個係我興趣及娛樂,尤其當你喺櫥窗睇中咗件衫,試上身嘅時候又fit身,心情真係好滾動㗎!

 

好喇,喺度首次公開我嘅韓國亡命shopping list先,大家準備定drop低note屎喇!

首先,新沙洞林蔭大道係shopping熱點,雖然嗰度主街已經陸續被名店進駐,但依然有好多別致嘅小店,提供啲質地靚又decent嘅靚衫,而且lady style比較啱上班族,我通常買嘅衫都係用嚟見客或者出function時着嘅,比較大體又有台型。而且沿途你會見到好多型男索女,特別係黃昏之後,佢哋就會出沒㗎喇,所以我行親呢度,對眼都好唔得閒(又要睇衫又要睇惡巴)。

【地鐵新沙站(Sinsa station 신사)8號出口】

 

跟住到狎軀亭Rodeo,呢度類似香港中環嘅蘇豪區,有名店亦有本地設計師自家品牌,價錢當然貴,但附近有好多特色coffee shops、餐廳同美容室,不妨喺度逛逛,感受一下首爾嘅時尚魅力。(Apgujeong Rodeo 압구정로데오 exit 6)

嚟到首爾,當然要到江南呢個整形醫院滿布嘅基地,當然我唔係帶你哋去整容,而係要介紹江南地鐵裏面嘅地下街俾你哋,因為呢度各式各樣商店,由頭到腳都照顧周到,而且價錢重幾平。兼且我以前嘅化妝學校就喺附近,所以可以喺度搵番我啲腳毛!

最後,我真係超鍾意弘大呢個不夜天,因為呢度係年輕人聚腳點,喺度有好多型格小商店,而且我好鍾意留意街頭嘅年輕人衣着,佢哋絕對係上演緊韓國最潮嘅時裝秀。例如,我留意到佢哋今年大熱棒球褸同牛仔褸再加爛牛仔褲(劉華《烈火戰車》look),我發咗癲咁入咗4件牛仔褸同3條爛褲,才驚覺屋企重有7、8件牛仔褸。所以我每逢返嚟韓國,都要住喺呢度嘅民宿。雖然東大門都係shopping熱點,但就冇咁地道,你會覺得似行緊尖沙咀廣東道咁囉~

 

 

大劑喇呢鋪,我點搬啲衫返香港呢…

 

text-Pink

 

Pink (핑크)

韓妝達人,本來過着刻板OL生活,自小愛扮靚,更鍾意韓國潮流文化,幾年前隻身遠赴韓國學藝,在江南著名化妝學府Atelier Makeup Academy實習,曾參與過無數韓國fashion shows的化妝實戰,亦試過為韓國小姐化妝。回流香港後,創辦Pink Evolution化妝學校,教授地道韓式化妝,又代理韓國化妝及護膚品牌。Pink長期港、韓兩邊飛,極為熟悉韓國地道及最新的潮流文化,連本土韓國朋 友亦為之驚歎!

詳情可瀏覽本人facebook 專頁PinkEvolution

《Instagram》 : PINKEVOLUTION

或電郵至[email protected]