【繼續跟「風」】杜如風《東京攻略》x《流行東京》x《風行全世界III東京》10大食店

飲食

廣告

小編有次去東京公幹,1個人唔知食乜好,只係諗到去涉谷食,於是就問杜如風(Helen)有乜好介紹,佢就叫我去當年香港未有嘅一蘭食拉麵,跟手去埋BEAMS Time Café食日式法蘭西多士。可惜,BEAMS Time Café啱啱已經喺 6月30日結束營業,要跟「風」去東京搵食,都要update一下資料先!呢個《東京攻略》+《流行東京》+《風行全世界III東京》嘅 杜如風東京攻略 搵食指南,希望幫到你。

text-Tammy photo-部分由杜如風提供

1. Curry Up

對於Curry Up,2013拍《風行全世界─東京篇》嗰陣,Helen曾經喺《新Monday》─《Honey》嘅專欄寫過:「根本看不出這間咖喱飯店是Nigo開的!最初跟着地圖找,一路行、一路行(因為它設於裏原宿的最開頭,近北參道方向),行到有點腳跛才找到。由於店子很細, 又沒有太潮的裝璜(基本上可以說是:沒有甚麼裝潢)!我問導演傑仔(他方向感比我強):『肯定係呢間?咁細咁普通嘅?』『應該係啦,地址同店名都一樣喎!』『間鋪好普通咋喎,咁拍唔拍好呀?』(《風行全世界》內的所有items,都要經小女的QC驗證)!我跟傑仔在門外躊躇了一陣子,導演一語道破:『我哋都行咗咁耐先嚟到呢度,就當我哋自己食晚飯囉!你先試吓啲咖喱得唔得!得就問吓佢哋俾唔俾我哋拍囉!唔得嘅咪快快脆食完走人囉!我就覺得呢度始終有talking point嘅,因為佢真係Nigo開架嘛!』結果, 我們先叫了1碟咖喱飯給我試食,然後我……『得呀!Roll機,開mic!』Nigo轉行轉得真好,他賣的咖喱確實很好吃!而且比起他賣的衫褲鞋襪經濟很多! 這間Curry Up,基本上分了小辣(直頭係甜) 、中辣和大辣(大辣又很極端地辣到飛起)!而分量呢,又係分3種,S、M、L,不禁令小女覺得我正在A Bathing Ape的鋪頭內買衫!」

提提你,午餐時間係由11:30am至5:00pm,而晚餐就係5:00pm至當日嘅last order時段,潮人喺原宿shopping晏咗都可以食到lunch。

地址:東京都渋谷区神宮前2-35-9-105 (最就腳車站:地鐵北參道或明治神宮前站)

營業時間:星期一至六11:30am-9:00pm(last order 8:30pm);星期日11:30am-8:00pm(last order 7:30pm)

 

2. 山內農場池袋西口駅前店

Helen拍緊《風行全世界III東京》嗰陣,老友杜汶澤亦身在東京拍攝《豪情3D》兼且推介咗呢間地雞專門店山內農場俾佢,所以Helen就同阿澤去咗呢間位於池袋嘅山內農場分店拍攝兼試食。當中Helen最推介嘅係雞肉刺身,好在山內農場係連鎖店,如果你唔去開池袋,去佢其他分店一樣得!

地址:東京都豊島区西池袋1-36-8 ロマンスビル 2F (最就腳車站:JR池袋站)

營業時間:星期日及公眾假期 5:00pm-00:00am;星期一至四5:00pm-2:00am;星期五、六及假期前夕5:00pm-3:00am)

 

3. Spring Valley Brewery

今次《東京攻略》第1集介紹嘅代官山Spring Valley Brewery啤酒廠,只要付出1,000日圓(約$62)就可以飲到6款啤酒,冒住有啤酒肚嘅危機都要試!

地址:東京都渋谷区代官山町13 ログロード代官山内 (最就腳車站:JR代官山站)

營業時間:星期一至六8:00am-00:00am;星期日及公眾假期8:00am-10:00pm

 

內容延讀

跟「風」必睇!杜如風《東京攻略》11大食店追加

我估杜如風都會like!今夏必食凍甜點 抹茶雪糕

 

 

4. Mr. Friendly Café

都係喺《東京攻略》第1集介紹嘅Mr. Friendly Café,今年4月14日裝修重開。其實Helen早喺推出首本著作《風行東京》嗰陣,已經寫過,Mr. Friendly Hotcake人形燒至今仍然係佢最推介嘅食品。

地址:東京都渋谷区恵比寿西2-18-6 SPビル1F(最就腳車站:JR代官山站)

營業時間:11:00am-8:00pm

 

5. Waffle’S beulah

1996年紮根代官山,直至今年6月17日至啱啱喺吉祥寺開咗分店,顧名思義,賣窩夫嘅,Helen都係喺《東京攻略》第1集推介佢。

地址:東京都渋谷区代官山10-3 (最就腳車站:JR代官山站)

營業時間:星期一至五11:30am-6:30pm、星期六、日及公眾假期11:30am-7:00pm

 

6. 名代宇奈とと

好味嘅鰻魚飯,除咗赤坂ふきぬき,重有呢間Helen喺《東京攻略》第2集推介嘅名代宇奈とと。佢都係連鎖式經營,唔去開中野,可以去其他分店。

地址:東京都中野区中野5-52-1 (最就腳車站:JR中野站)

營業時間:11:00am-11:00pm

 

7. 無邪気自由が丘南口店

呢間以拉麵聞名, Helen《東京攻略》第2集有介紹,想食拉麵但又唔想食一蘭,可以試下佢。

地址:東京都目黑區自由が丘 1-31-2 (最就腳車站:東京急行電鐵自由之丘站)

營業時間:11:00am-4:00am

 

內容延讀

跟「風」必睇!杜如風《東京攻略》11大食店追加

我估杜如風都會like!今夏必食凍甜點 抹茶雪糕

 

8. 大阪焼肉・ホルモン ふたご

好有氣氛嘅燒肉及烤內臟連鎖店,店員幫你燒埋不特止,重會一路燒一路打氣,今年5月更加衝出日本,進軍埋美國紐約開鋪,難怪Helen喺《東京攻略》第3集都要介紹下。

地址:東京都渋谷区道玄坂1-19-10 J1-ビル 1F (最就腳車站:JR渋谷站)

營業時間:星期一至五5:00am-2:00am、星期六、日及公眾假期5:00am-00:00am

 

9. Shiroichi白一渋谷店

有「冰淇淋界的勞斯萊斯」之稱嘅日本白一Shiroichi 10秒生淇淋,上年喺台北東區開咗海外分店,引嚟一陣熱話同排隊潮,而且佢亦喺首爾開咗分店。即使你喺台灣、首爾都食過,但嚟到日本總壇,當然要再食。所以無論2008年嘅《流行東京》定今時今日嘅《東京攻略》(第4集),Helen都要一再介紹。

地址:東京都渋谷区神南1-7-7 アンドスビル2 1F (最就腳車站:東京Metro地鐵渋谷站)

營業時間:11:00am-8:00pm

 

10. 天丼てんや 渋谷地下鉄ビル店

Helen喺《東京攻略》第4集推介嘅呢間天婦羅店,都係連鎖式經營,店鋪外觀睇落平平無奇,但Helen就讚啲天婦羅夠脆,係親民抵食之選。

地址:東京都渋谷区渋谷1-16-14 地下鉄ビルディング (最就腳車站:東京Metro地鐵渋谷站)

營業時間:11:00am-11:00pm

 

內容延讀

跟「風」必睇!杜如風《東京攻略》11大食店追加

我估杜如風都會like!今夏必食凍甜點 抹茶雪糕