仔囡首度接受訪問 大細路爸爸森美展露不為人知感性一面

流行娛樂

廣告

多年來,商台DJ森美把家庭事低調處理,很少公開提及一對仔女,好讓他們能在鎂光燈外自由發展。森美的14歲大公子曦樂(Lancelot)早前開始到英國升學,細女曦童(Charisse)獲選為八位小太空人之一,森美有感仔囡已經長大,終於放手讓她在鎂光燈下表達自己。他們一家首次接受親子專訪,曦樂和曦童起初雖有少許怕醜,但當慢慢講到熟悉的話題,兩人都侃侃而談,舉手投足流露出如爸爸的自信。

text-Sunday Kiss , edit-Cherie , Photo-Sunday Kiss

搞怪爸爸

森美在鏡頭前常帶給觀眾歡樂,曦童笑言爸爸在家也是搞笑之人,但做錯事都會照鬧;曦樂就十分享受父子的玩樂時間,經常一齊打機商討策略,「我哋試過去東京旅行凌晨三點落街捉Pokémon,玩咗三個鐘!」打機能訓練思考及反應,只要能幫助仔女成長,森美就樂於讓他們嘗試,正如從訪問中他看到仔女能詳細表達自己,作為旁觀者的他十分享受。

仔女無遺傳ADHD

森美小時候有專注力失調及過度活躍症(ADHD)的問題,讀書背誦好辛苦,同學用一小時溫習,他要花足三小時,才能追到成績中游的程度,直到現在工作都受影響,有時不能集中精神睇稿。幸好這問題沒有遺傳給一對仔女,尤其女兒讀書名列前茅,兒子亦只有少許症狀。「個仔性格比較似我,大大吓個心野啲,你睇佢個樣、講嘢同思維都有啲似我,所以佢好細個我就帶佢做評估,好彩佢只係有啲症狀,會容易坐唔定,但個程度未去到ADHD呢個病。依家佢都會唔專心,但佢背嘢快我好多,我就知佢無問題。」

20歲的森美一臉稚氣,與囝囝都有點相似。

四年前森美帶兒子去迪士尼玩。

想不到轉眼間兒子已經長大了,思想也成熟了。

森美指男女是兩種不同的動物,教法自然有不同,對兒子會較重視紀律,要嚴厲一點;但女兒本身已很守紀律,不必加以督促,反而要防止女兒刁蠻任性,教好她待人的態度。

曦樂的樣子、說話及舉手投足都似爸爸,曦童則似媽媽溫柔靚女。

憑故事創作 獲選小太空人

曦童向來不是充滿探索精神之人,但去年在學校聽過師兄師姐分享後,開始嚮往做小太空人,「可以參觀太空中心,仲有family camp,好想報名參加。」惟媽咪Veronica認為女兒要兼顧很多課外活動,準備時間不足,不應倉卒參加。今年曦童充滿決心,向媽咪多番解釋活動,並分配好練習直笛、田徑等課外活動的時間,盡量在學校完成所有功課,終獲媽咪開綠燈參加,曦童立即著手準備一份創意作品。「我寫咗一個故事,同爹哋畫咗幾幅畫,我寫故事時爹哋同哥哥都畀咗好多意見,應該加咩落去好啲。」

孩子踏入青春期,森美要面對更複雜的問題,但同時樂見孩子成長。

曦童創作的小太空人故事中,以自身經驗作藍本,講述一個立志成為太空人的小男孩,每天都會寫信到NASA,終於得償所願,但他成為太空人後卻遇上不少困難,腦海中亦有聲音叫他放棄,幸好他堅持下去,絞盡腦汁解決難題,最後成功返回地球。

想做兒童小說作家

就讀聖保羅男女中學附屬小學的曦童成績名列前茅,不覺得讀書辛苦,但曦樂就覺得讀書好辛苦,太多測驗考試,最難是中文科,「好多嘢讀,尤其係中文好深,有好多單元檢測,成日驚唔合格。曦童將來最想做一個兒童小說作家,希望吸引更多小朋友享受閱讀,喜歡上學。「因為我細個唔鍾意返學上堂,但我鍾意睇書,想返學學多啲英文去明白書中內容,所以我想參加小太空人學多啲嘢,將來可以寫有關太空嘅故事。

太太Veronica陪囡囡赴美國參加「太空探索之旅」。曦童(左 )最難忘旅程中的「模擬火星任務」,需與隊員們合作完成。

曦童最後在二千名參加者中脫穎而出,與媽咪同赴美國參與為期九天的「太空探索之旅」,曦童最難忘一次模擬火星任務。「可以扮坐火箭上火星,好似真嘅太空mission咁控制,我喺任務入面做mission specialist,去到火星後個太空站無晒油,要將火箭上嘅油送入太空站,然後其他隊友就模擬整風車,幫助火箭同太空站發電。」曦童首次參加制服團體活動,明白到紀律的重要性。

多一個身分 多一份責任

曦童回來之後,哥哥曦樂發覺妹妹有所成長,對太空知識的廣闊程度更嚇了他一跳!森美也樂見女兒的進步,更利用「小太空人」的身份引導她更多,「當佢有嘢做得唔好,或者佢話做唔到,我就話你係小太空人喎,經過二千人去挑選你,你應該做得到啦,佢聽完就會做番好,所以佢孭多個身份,多咗份責任。」不過,森美有時會濫用「小太空人」教女,「佢坐得唔好,我話『你係小太空人喎』,即刻坐番直;食飯食唔乾淨,『你係小太空人喎』,即刻扒晒啲飯。」

當森美聽到女兒想參加小太空人時感到意外,反而兒子更愛探索世界,例如在網上看到別人整火槍,自己會去五金舖買材料研究一番。森美既欣賞囝囝的探索精神,同時感到憂心,「危險吖嘛!不過男仔係咁㗎喇!」

爸爸想大仔讀醫被拒

一向積極參與課外活動的曦童,曾參加不少比賽如校際朗誦節、校際音樂節,取得直笛及二重奏冠軍,相反哥哥曦樂是聖若翰救傷隊(St. John)一員,相約訪問時他設下的唯一條件,就是不影響他參加St. John的訓練。森美認為小朋友學好紀律十分重要,參加制服團體有助紀律訓練。他又形容自己是典型家長,希望仔女讀醫,兒子既然玩得St. John,應有興趣從事醫學方面,曦樂直指爸爸的看法不正確,St. John對他最重 要是當中的團隊精神。「喺St. John除咗可以幫人,隊員間仲會互相幫助,交流讀書意見,我哋好似一個大家庭。」

曦樂主動提出想去英國讀書增廣見聞,森美本來不贊成兒子出國,覺得一家人應在一起,表明「好唔捨得」,但最後也尊重兒子的意願,希望他不要只做書蟲,要多點出去玩,增加生活體驗,而女兒暫未有出國打算,「香港嘅學校都好好,學到好多嘢。」

14歲的曦樂未有如妹妹已定下理想,現階段只想做好本份讀書,將來條路會自自然鋪出來。森美指兒子對歷史最有興趣,想不定將來的路與探索歷史有關。曦樂去英國學校面試時透露自己喜歡歷史,尤其對亨利七世至伊利沙伯女王 一世那段時期,令面試官十分好奇一位香港學生對這段歷史如此有興趣,最終取錄了他,曦樂現已遠赴英國開學。

早前森美陪兒子去英國開學。

最近兩父子一同看電影《鄧寇克大行動》,是由曦樂提出,以前兩父子只看卡通片或真人英雄片,森美聞言覺得兒子長大了許多,甚至比自己對這套戲的歷史背景更熟悉,曦樂解釋想看的原因:「套戲好有趣,以前睇書睇過,我覺得套戲幾好睇,不過有啲地方唔係好忠於歷史。」至於爸爸的作品,曦樂笑言甚少收聽收看,「冇乜興趣,得閒先聽吓,平時返學冇得聽,放學又唔想嘥時間聽番,真係想聽番阿爸又叫我溫書,所以都係讀書為重。」被個仔形容為「嘥時間」,森美可有失望?他大笑道:「都啱㗎!」

訪問令仔女有進步

森美近日推出了新書《 提早跟孩子做朋友 》,擺明車馬談及一對仔女,曦樂表示有看過,但逛書展主攻歷史書,一本馬克斯、三本北韓,森美笑稱怕兒子有獨裁傾向,曦樂反駁道:「呢排北韓射導彈,我想了解多啲呢個國家啫。」曦樂跟學校去北京交流,更購入中英對譯版本的《毛語錄》閱讀,他覺得內容很有趣,不過此舉嚇怕了媽咪呢!

森美最新出版的《提早跟孩子做朋友》,分享與子女間的相處經歷,希望幫助其他家長改善與子女的關係。

至今出版了十多本著作的森美,以前不明白出書為乜,現在發覺對孩子有作用,「Touch wood有日我魂歸天國,佢哋睇番我寫嘅嘢,就明白爸爸當時對某啲事情嘅看法,都幾有意義。」換轉角度,森美今次讓仔女接受訪問,亦可聽到孩子一些想法,有些更是從未聽過。「我都好少聽到佢哋講咁多嘢,我都幾享受,呢種溝通好單向,但同時我可以抽開望住佢哋思考,好似你問阿仔問題,佢答,而唔係我答,咁就係阿仔長大喇,我好享受依家呢個moment。」

森美收過不少家長提問,他以過來人身份安慰家長,他正正就是一個人辦,「你睇我都讀完,又有工開,唔使擔心啦!我希望將來出一本書,將我過去經歷同家長分享,尤其是相處嘅心得最緊要,不過我讀書就唔係好叻。」

內容延讀:
林峯老豆竟然是陳豪?前傳《 使徒行者2 》揭各人身世之迷
>LIKE我們fb<<<
www.facebook.com/newmonday.com.hk
 

關鍵詞
森美