adidas FITMIND YogaRun x 林德信 瑜伽思想
text – Lok（ig：loklokb1021） photo – Rover
瑜伽男神
冇錯，adidas FITMIND YogaRun係一個女生專屬活動，只限運動女生參加，但如果你好似Alex咁，又靚仔、又大隻、重係瑜伽高手，咁就可以例外，作為當日大會導師之一，Alex將會帶領過千名女生一齊做瑜伽，到底佢又點睇呢件事？
N：《新Monday》 A：林德信
N：5月就係adidas FITMIND YogaRun，你覺得「Yoga」同「Run」有咩關係？
A：「兩者其實互相幫助，我自己跑步前後都會做瑜伽，無論運動前熱身定運動後拉返鬆啲筋都好有幫助，大部人跑步前都會拉吓筋，但每個動作10秒就開始跑，其實拉唔夠，所以我覺得今次呢個「Yoga」同「Run」嘅融合好好。」
N：點樣幫助參加者學習瑜伽？
A：「學瑜伽其實都需要好多時間，冇可能第1日就玩得好好，一定要放好多時間、心機落去練每個技巧、姿態，今次活動我相信會有好多第1次接觸瑜伽嘅女生，每個人都要踏出第1步先會有所收成，我當日都會教啲比較基本嘅動作，當係1個introduction。」
N：你認為參加者可以有咩得著？
A：「我記得我自己第1次學瑜伽，我咩都唔識，完全唔知發生咩事，淨係覺得好攰好痛，但每人都要有個first class去踏出第1步，去認識呢個運動，我希望未接觸過瑜伽嘅朋友可以對瑜伽有所了解，之後會有興趣去學，而本身玩開瑜伽嘅就盡情enjoy，因為瑜伽愈多人愈好玩，冇咁悶，辛苦亦有人互相鼓勵，相信當日現場energy會好high。」
N：點睇呢個女生運動趨勢？
A：「呢個係近幾年突然冒起嘅趨勢，亦係潮流，愈嚟愈多呢種女生專屬活動，而且規模愈嚟愈大，我覺得好正，個idea開始發大，所有運動event其實都係想製造一個社交圈子，令所有鍾意運動嘅女生聚頭，一齊去做，非常正面同健康。」
N：你點樣分配運動同工作時間？
A：「我日日都會做瑜伽，最難就係宜家拍緊戲嘅時候，但如果我有半小時break，我都會走埋一邊做少少瑜伽，某程度上幫到自己減壓。另外我重會跑步、做gym、踩單車、行山等等，有時做完
gym，肌肉開始漲同緊，咁我就會做吓瑜伽放鬆，平衡返自己身體，而且運動的確可以令人身心舒暢。」
N：你期待adidas FITMIND YogaRun嗎？
A：「好期待，其實我真係未試過去1個全女生嘅event，香港亦係第1次有呢種大型瑜伽加跑步活動，收到邀請我都覺得好榮幸，因為當日除咗參加者，重會有好多瑜伽老師在場，大家可以互相交流，我亦都會做到最好，希望俾到一個好嘅訓練大家，亦希望瑜伽可以更加普及。」
adidas FITMIND YogaRun
日期：2015年5月3日(星期日)
時間：12:30-18:00
地點：亞洲國際博覽館3號展館
費用：港幣$380 （全數撥捐思覺基金作慈善用途）
更多關於是次活動內容，可瀏覽以下網頁：http://adidas.digitalcampaignasia.com/yogarun/
由於反應熱切，公開組名額已經爆滿，感謝大家不遺餘力支持是次慈善活動。而已獲成功報名的#mygirls，請於當日準時出席體驗這次嶄新的運動組合。
內容延讀
