愛回家｜疑大膽暗寸193開cafe一事：開間cafe要7位數架！

《愛回家》以蔥頭開cafe暗寸193：唔係為咗賺錢

昨晚（3日）最新一集《愛回家之開心速遞》故事講述蔥頭以明星效應開咗間cafe，大小姐得知後即刻捧場打卡，強調蔥頭間cafe裝修非常具有「個人風格」，蔥頭仲話佢開cafe唔係為咗賺錢，係為咗可以同佢的粉絲聚會，呢句說話疑似暗寸193。早前193強調cafe裝修，仲講過自己開cafe係擺明「呃你錢」「咖啡豆、麵包等成本價平，擺明係要呃你哋錢。當時想再Set高啲價錢，發現市面上啲Cafe賣得仲貴，不過良心發現，保持返原本的價位。」而且劇情仲講到蔥頭cafe一開業，就立即引來一眾女粉絲捧埸，似足193一開業就狂吸「老婆們」同圈中粉絲好友鼎力支持咁！

強調開cafe要7位數

Terry見到蔥頭開cafe勁賺錢，即想學佢以明星效應開cafe，想大小姐、舅父kc幫忙打本開cafe。大小姐即強調開cafe要好多成本「起碼要成7位數」，勁似影射193郭嘉駿投資七位數開cafe。而且大小姐強調人地蔥頭名氣大、粉絲多，先做到明星效應賺到咁多，相反Terry就無人識，賺唔到錢。

《愛回家》重溫：

重溫193回應網民投訴：「如果要平可以去食兩餸飯，嗰啲你可以企喺街邊度食」

4月才開業的193《Tanuki Coffee》問題多多，未開業租金蝕逾三十萬，開業後第三天因食物供應不足突然煞停，193都坦言自己經驗不足，超出他的預期。後來愈來愈多網民幫襯完仲投訴指名符「呃錢」，影晒相tag cafe指出該cafe賣的包唔值＄98，餡料偏少又唔好味！跟住仲俾網民大起底指193抄韓國Egg Drop吐司店，就連裝修設備、食物種類都抄都足一足！面對投訴多多的網民，一向敢言的193大方於回應網民，認為有呢番投訴的網民應該少去cafe幫襯：「cafe一向都呃錢，如果你要平可以去食兩餸飯，嗰啲你可以企喺街邊度食。而佢嘅cafe有裝修有配件，呢個價錢係正常。」食物質素方面，佢都睇咗網民拍攝的圖片，有向合資的parter反映，已經改良好，就連食譜都大大更改！叫大家可以放心再次幫襯：「包你食到嘔！」唔知網民聽到193今次的回應後有無多番啲信心去幫襯？