TVB多個藝人中招 因停廠疑每日損失過百萬 未來真係無電視睇？

拍劇群組、帶病照開工

有傳好多TVB藝人就算確診咗都照開工拍劇，搞到成個劇組好多人中招，先後多個藝人確診如：周嘉洛、羅樂文、胡定欣、馮盈盈、戴祖兒等人。拍劇時劇組人數又多，又無得戴口罩，傳播風險自然提高。TVB喺大約一星期前終於宣布停晒所有開拍緊嘅劇集，例如《破毒強人》、《回歸》、《曙光》、《法言人》、《隱門》等，進行大規模消毒。

每日損失7位數

而家停晒工，糧照出，本來已經蝕緊錢嘅TVB面臨疫情問題，每日再損失成200萬，之後點同啱啱公布一年賺成億嘅ViuTV競爭呀？唔通真係靠聲夢同Super Tiger？

8點無愛回家睇？、播舊劇《食腦喪B》

《愛回家之開心速遞》劇集雖然有唔少藝人中招，但係唯一例外，工照開。另外TVB嚟緊會播返2年前拍定嘅舊劇由何廣沛同江嘉敏主演嘅《食腦喪B》以維持正式運作，唔知可以頂到幾時？

有唔少網民都表示有期待，認為呢啲另類題材「倉底貨」仲好睇過大制作。不過有啲就認為係抄外國早幾年嘅電影同劇集。

重播已經解決問題

TVB都幾興重播舊劇，有唔少網民認為舊劇仲好睇，重播已經解決到問題，分分鐘仲好過而家嘅收視。

有網民就再偏激啲覺得無劇集睇都唔緊要，播吓卡通片都仲得。

如果疫情再係咁嚴重，無了期停工落去，可能真係買劇先搞得掂，話唔定收視仲好過而家，唔駛蝕咁多。