8件估佢唔到 Call的Apps爆趣奇聞
text-Oscar photo-網上圖片
1. 搭的士送「尿袋」
放心，唔係醫院用嗰啲真尿袋！事緣我哋高大威猛嘅同事A，用call的App《快的》call車，同住同區嘅同事B一齊搭返閨。
落車時司機唔止找錢，重話：「而家邀請朋友裝《快的》App，會送個叉電器俾你。」朋友B當下二話不說，「自動波」裝咗個App，咁就有個「尿袋」攞返屋企，喂，我覺得真係so喎！
2. 的士變免費坐7人車
講so呢，《快的》真係so。（我哋無收廣告費呀！）
事緣有個巴打話用《快的》App，講到明快的就梗係的士嚟啦。但佢落到樓驚覺等緊佢嘅係架7人車，有一刻佢以為有人標佢參，但好奇心驅使下，佢最後都上咗車。落車時司機重話程車唔使錢添，搞到呢位巴打以為自己發緊夢！
原來呢樣係《快的》嘅新服務「一號專車」，會有靚車接載大家，不過服務喺3月先推出，而家喺試行階段期間。呢段時間call佢哋，隨時會有「一號專車」嘅司機接你支旗，當然都係免費啦！
3. 搭的士送埋外賣俾你
香港地call的，有時啲的士大佬遲到，肯講「唔好意思」已經好難得。
觀塘生果檔老闆大哥成報料，就話收鋪call的士返屋企，等咗一陣後，個司機打俾佢話：「唔好意思，食tea食遲咗，而家先出車，使唔使幫你買埋tea？」
大哥成諗住呢位司機大佬「吹水」，就求其order個餐蛋麵。10分鐘後，架的士嚟到，真係有碗餐蛋麵，佢重話：「我遲到，請你食當補返數！」
大哥成話覺得司機又唔係搵得多，唔好意思要人哋請，就照俾番碗麵錢個司機，最後重做埋friend添！
4. Uber搵笨？
有高登巴打話試過趁住《Uber》App有$200搭乘的士優惠時，call的入機場，點知嚟咗架Benz，結果埋單成$450，重要冇得用優惠，嬲到佢震！
最後佢先知《Uber》可以call 的士、call名貴房車同call貨van，而個優惠只適合於的士服務。其實《Uber》之後都有個call van優惠，所以用呢個App嘅時候，記得睇清楚！
5. 坐車撞女鬼？
有晚記者G君call咗架的士由觀塘返馬鞍山，遇到個陰陰沉沉嘅女司機，但G君冇乜理會，諗住上車恰一恰，點知開車無耐，女司機大叫：「有個女人喺度呀！」G君成個醒晒，手心出汗，又唔敢向右邊望，心諗「唔係咁猛呀」，女司機亦再冇出聲……
當的士去到九龍灣，女司機話前面塞車要改路行，G君見女司機打開悶局，佢膽粗粗問女司機：「係唔係有個女人喺的士入面呀？」女司機話：「冇！我用hand free同成班男行家吹水，其中有個乸型行家，我鬧佢成個女人咁啫！」
6. 的士豔遇？
如果大家唔夠錢俾車資，會點做？
的士陳報料，某個晚上佢如常收call接order，但個女乘客喺開車無耐，發現自己身上得$20，於是佢同的士陳講：「我身上得$20，俾你摸下當車費得唔得？」的士陳話梗係唔制，都唔知條女會唔會屈佢非禮。「不過見佢係女仔，唔想夜媽媽放低佢喺路邊，就做好心車佢去到目的地，收佢$20算囉！」
7. 司機接call 最愛Nokia
大家有冇留意的士車頭放咗1排電話？原來司機大佬用嚟save低各位「老細」嘅電話，當對講機兼接call用。咁究竟邊個手電牌子最多人用？的士陳就話：「咪Nokia囉！因為佢收得清，防撞能力一流，加上$500就有部，平靚正呀！」
8. 向「其他要求」許個願
唔同嘅call的Apps都會提供唔同優惠吸客，原來只要細心，就會有額外bonus添！好似有巴打就話試過用call的App《HK Taxi》，喺call車頁面有項「其他要求」，有人試過輸入「85折」都有司機大佬「接旗」（呢個App本身係冇打折嘅），下次call車嘅時候，不妨進取啲，試下輸入「8折」、「75折」、「我想要發哥做司機」，話唔定願望成真！
有沒有關於香港的有趣盤點？
香港地從來不乏心靈熱點，香港不少地方均設立行刑場，正正是大部分屋邨興建時的前身，盤點香港猛鬼屋邨 ，信不信由你！不少朋友都喜歡想當年，香港懷舊小食 及這10款最愛夾糖是不少人的共同回憶，沒有高檔的食材，卻塑造出最難忘的味道。提到昔日蒲點，旺角絕對係大家留低最多腳毛嘅地方，千禧年代必去蒲點 ，你又去過幾多個呢？
有甚麼必學生活小智慧？
天氣時熱時凍，容易令人患上小感冒，唔想次次依靠藥物？可以試試這8招必學鼻塞穴位方法及7大喉嚨痛舒緩方法。除了感冒外，生痱滋亦非常影響日常生活，坊間有各式各樣的解決痱滋方法，助你解決痛楚！
