【率先對戰蕉蕉蕉！】鐳射槍戰射入銅鑼灣

Jun 23 2015

想打war game過下癮，但而家天氣咁熱，喺山上玩大汗淋漓，就算喺工廈室內玩冇咁熱，但被射中又會痛喎，怕痛嘅你點算呢？今個月喺銅鑼灣就開咗間以太空船為主題嘅鐳射槍（laser tag）對戰基地，迷宮達2,800呎，設備同系統都由新西蘭進口。大家可以感受射擊嘅快感，重唔會痛、又唔怕射親人，而且可以組隊參加，一大班人一齊分組互相廝殺。

text-Jessie photo-由LASERMADS提供

所有玩家都配備1把槍同1件背心，每把鐳射槍都有兩款武器可以選擇，分別係用以遠距離射擊嘅幼紅外線PHASER，同可以同時間擊中多於1個目標嘅廣角紅外線BLASTER，所以都好考臨場應變反應。

背心上面一共有4個感應器，喺前後同埋兩肩上。要至少向感應器射擊3次，先至可以完全將對方打低。

不過被打中，唔會冇得玩落去，能量值（喺顯示嘅右下方）會自動恢復，大概10至12秒又會再重新啟動。喺呢段時間，可以匿埋重新部署，能量值一滿又係一條好漢，可再次殺出重圍！